Tuka ntama, Mbangi za Yehova mbangululu za mpila na mpila za Bibila beri sarilaka, beri dukisaka mu mashini, mpe beri kabaka kwe bantu. Kâ twayizi mona ti tufweti dukisa mbangululu ya môna yilenda bakisa muntu na muntu mu baka “nkatika nzayulu ya tsieleka,” moria bwe luzolo lwa Nzàmbi. (1 Timote 2:3, 4) Ntsiangu, mu mvula 1950 twabatika mu dukisa Bibila tsieto, Mbangululu ya nza ya mona mu bitinibitini. Bibila tsiango tsitsonamane mu nzonza ya ntangu ya beto, mu mazu yoka 120, mpe tsitomono dukisa tsieleka buna bufwanakane.

Bibila tsiango katsiena mpashi ko mu bakula. Ntangu buyikweyokeke, mazu mazonzaka bantu soba makwesobeke, mpe mbangululu zazingi zatiri na nzonza ya ntama ye mpashi mu bakula. Mpe, bantu bayizi vundumuna matsonoko ma ntama matomono delakana na Bibila dia ntetentete. Matsonoko mango masarisa bantu mu tomo bakula mazu matsonamana Bibila: Hebre, Arameye, mpe Greke.

Mbangululu yiwisane na Zu dia Nzàmbi. Bantu babangula Bibila mu mazu makaka kabafweti soba zu dia tuka kwe Nzàmbi ko kâ peleko bafweti landa matsonoko ma ntetentete. Kâ mbangululu zazingi zilombo sarilaka nkumbu ya Nzàmbi Yehova mu matsonoko manlongo.

Mbangululu ya Bibila yifweti zitisa Nzàmbi nkwa Zu dio. (2 Samwele 23:2) Mbangululu ya nza ya mona yakarisa nkumbu ya Yehova ha mbuka zazansoni ha yatsonamana yoka ntsa 7000 mu matsonoko ma ntama ma Bibila, ntsiana bu basongese wô hobandaho. (Mikunga 83:18) Tekela mu dukisa Bibila tsiango, bô babangula tsio nkatika fiongonene beri kwe fiongonene ngati badukisa mabanza ma Nzàmbi buna bufwanakane. Ntsiangu bantu bayangalalaka mu tanga Bibila tsiango. Ni bulombo ba na Mbangululu ya nza ya mona mu zu diaku, tukulombele watangaka Zu dia Yehova bilumbu biabiansoni.​—Yoswa 1:8; Mikunga 1:2, 3.

• Ntsi biatunata mu dukisa mbangululu ya mona ya Bibila e?

• Ngâna ntsia tifu tiambote kontso muntu wô zololo mu zaba luzolo lwa Nzàmbi kafweti ba na tsio?