Yaˬhoˉvaˬ ve Shaˉhkiˆhkanˍ ve chaw lehˬ Liꞈ hpu yuˬ tawˆ ve maˇ shuˍ daꞈ ve laiˉ kʼoˆ yanˍ tawˆ leh pehˬ piˇ ve laiˉ chi hkʼawꞈ gaˬ˗oˬ. Yaꞈ hkʼaˇ, Gʼuiˬ sha dawˇ law ve hkʼe teˇ gʼaˇ le le “hteˇ ve cawˇ ve htaꞈ shiˍ la tuˬ,” Liꞈ hpu awˬ suhˉ teˇ kʼoˆ gʼa yuˬ tawˆ cawˇ ve tehꞈ ngaˬ hui shiˍ la ve yoˬ. (1 Tiˆmoˉseˍ 2:3, 4) Hkʼe te leh, 1950 hkʼawꞈ htaˇ tanˬ leh Miˬ guiˬ awˬ suhˉ yuˬ tawˆ ve Liꞈ hpu teˇ tawn tawn htaꞈ ngaˬ hui yanˍ tawˆ ve yoˬ. Chi teˇ kʼoˆ chi beuꞈ teˇ co˗e ngaˬ hui yehˇ chehˇ ve tawˇ hkawˇ yehˇ leh yuˬ tawˆ ve yoˬ. Liꞈ hpu chi teˇ kʼoˆ 130 hpaˆ chaw ceuˬ tawˇ hkawˇ cawˇ ve awˬ hkʼaw lo yuˬ tawˆ taˍ ve yoˬ.

Na gʼa sha ve Liꞈ hpu teˇ kʼoˆ cawˬ cawˇ ve pa taw yoˬ. Tawˇ hkawˇ lehˬ teˇ co˗e peuˬ teˇ co˗e pa kʼai ve yoˬ. Liꞈ hpu laiˉ kʼoˆ lehˬ maˇ yehˇ˗oˬ ve maˇ heˆ leh haˍ ve tawˇ hkawˇ kaꞈ cawˬ ve yoˬ. Chi hkʼoˆ kaꞈ, cawˬ taˍ ve aꞈ kehˉ awˬ hkuiˉ puiˍ ve htaꞈ hawˍ daꞈ ve liꞈ daw awˬ piˍ kʼawꞈ ca mawˬ ve yoˬ. Chi htaꞈ pa taw, Heˍbrehˇ, Aˍraˍmiˆ, leh Heˍlaˍsaˆ tawˇ hkawˇ tcuhˉ kuiˬ ngaˬ hui oˇ htaˇ aꞈ kehˉ na gʼa ve yoˬ.

Gʼuiˬ sha ve tawˇ hkawˇ htaꞈ hawˍ daꞈ ve Liꞈ hpu yuˬ tawˆ cawˇ ve pa taw yoˬ. Liꞈ hpu yuˬ tawˆ paˍ lehˬ awˬ hkuiˉ puiˍ ve Liꞈ hpu htaꞈ hawˍ daꞈ ve hkʼaw gʼa yuˬ tawˆ cawˇ ve yoˬ. Gʼuiˬ sha dawˇ pawnˍ piˇ ve liꞈ chi ve tcuhˉ kuiˬ maˇ pa cawˇ. Yaꞈ hkʼaˇ, Liꞈ hpu laiˉ kʼoˆ hkʼaw Gʼuiˬ sha ve awˬ meh Yaˬhoˉvaˬ htaꞈ yawˇ hui maˇ yehˇ.

Dawˇ pawnˍ piˇ shehˍ hpaˇ htaꞈ chiˇ mvuh ve Liꞈ hpu teˇ kʼoˆ cawˬ cawˇ ve pa taw yoˬ. (2 Saˍmo˗eˍlaˆ 23:2) Awˬ hawˉ lo cawˬ ve awˬ han hkʼe, piˍ jaˇ ve Liꞈ hpu awˬ daw teˇ hpaˍ hkʼaw Gʼuiˬ sha ve awˬ meh aˬ laˬ hkʼe 7,000 pawˆ cawˬ leh, chi ve hkʼa peu˗eˬ Miˬ guiˬ awˬ suhˉ yuˬ tawˆ ve Liꞈ hpu hkʼaw kʼawꞈ yuˬ keu taˍ ve yoˬ. (Chiˇ mvuh ve 83:18) Liꞈ hpu chi teˇ kʼoˆ yuˬ tawˆ tuˬ awˬ pon laiˉ hkʼawꞈ ca hpfuhˆ ve pa taw, Gʼuiˬ sha ve dawˇ hkʼaˇ hkʼa dehꞈ hpeuꞈ maw laˇ leh gʼaw sha ve yoˬ. Miˬ guiˬ awˬ suhˉ yuˬ tawˆ ve Liꞈ hpu nawˬ ve tawˇ hkawˇ awˬ hkʼaw lo cawˬ maˇ cawˬ ve htawˇ, teˇ nyi le le Liꞈ hpu gʼaw gaˇ tuˬ ngaˬ hui nawˬ htaꞈ awˬ gʼaˇ piˇ laˇ gaˇ ve yoˬ. —Yawˇsuˆ 1:8; Chiˇ mvuh ve 1:2, 3.

• Liꞈ hpu awˬ suhˉ teˇ kʼoˆ yuˬ tawˆ cawˇ ve tehꞈ aˬ htoꞈ ma pa taw ngaˬ hui dawˇ cheˆ ve le?

• Gʼuiˬ sha ve a loˍ shiˍ gaˇ ve chaw teˇ nyi le le hkʼaˬ hkʼe te cawˇ ve le?