Hamyaka yayivulu yinahichi kunyima, Vinjiho jaYehova vazachishilenga jiMbimbiliya jakulisezaseza jize vapulitilenga nakupangila kuvatu. Oloze twamwene ngwetu kuli nakusakiwa kwalumuna chachihya chize nachikafwa vatu vosena valinangule “chinyingi chakwoloka chakutachikiza muchano,” kweseka namwaya muchima waKalunga. (WaChimoteu 1, 2:3, 4) Ngachize, mu 1950 twaputukile kulovola vihanda vyaMbimbiliya yaVisoneka vyaKaye Kakahya mulilimi lyalyashi kwivwa. Mbimbiliya kana vanayalumuna nakashishi mumalimi akuhambakana ha 100 jino.

Kwapwile nakusakiwa Mbimbiliya yayashi kwivwishisa. Malimi eji kwalumukanga mukuhita chalwola, ngocho jiMbimbiliya jajivulu jikwechi mazu akushikulu chikuma aze amakalu kwivwa. Kaha nawa jimanyusikilipiti jakushikulu jakwoloka jize vawana jinakafwenga chikuma kwivwishisa chiHepeleu, nachiAlamayiki, nachiHelase vazachishile hakusoneka muMbimbiliya.

Kwapwile nakusakiwa Mbimbiliya yakwalumuna nakashishi kweseka naMazu aKalunga. Vaka-kwalumuna Mbimbiliya vatela kupwa vakashishi hakwalumuna Mazu aKalunga vahwima, muchishishisa chakuhakamo kala vyuma vanasake. Chaluvinda, mujiMbimbiliya jajivulu, lijina lyaYehova kavalizachisa muMazu-vasoneka Ajilako.

Kwapwile nakusakiwa Mbimbiliya yize yavumbika Mwenyayo. (Samwele 2, 23:2) MuMbimbiliya yaVisoneka vyaKaye Kakahya, lijina lyaYehova valikindulwisa mapapa 7,000 haze lyatela kupwa, kweseka najimanyusikilipiti jaMbimbiliya yakushikulu, nganomu vanasolola muchakutalilaho chili mwishi. (Samu 83:18) Eyi Mbimbiliya yambachile myaka yayivulu yakuhehwojola vihande, ngocho yapwa yamwaza kutanga mwomwo yasolola hatoma vishinganyeka vyaKalunga. Tuli nakumikolezeza mutangenga Mazu aYehova hakumbi hakumbi numba mupwa naMbimbiliya yaVisoneka vyaKaye Kakahya mulilimi lyenu chipwe nduma.—Yoshuwa 1:8; Samu 1:2, 3.

• Mwomwo ika twamwene ngwetu kuli nakusakiwa kwalumuna chachihya chaMbimbiliya?

• Chijililo muka chamwaza atela kupwa nacho mutu nge mwasaka kulinangula mwaya muchima waKalunga?