Kum sâwm bi tam tak chhûng chu Jehova Thuhretute chuan Bible lehlin chi hrang hrang an hmangin, an chhu chhuak a, an sem chhuak bawk a ni. Mahse, Pathian duhzâwng anga mi zawng zawngin ‘thutak hriatna’ dik an neih theihna tûra kan ṭanpui ṭhat zâwk theih nân, Bible lehlin thar tihchhuah a ngai tih kan hre ta a. (1 Timothea 2:3, 4) Chuvângin, kum 1950 aṭangin, tûn lai ṭawnga Bible lehlin New World Translation a ṭhen lai chu kan tichhuak ṭan a. Chu Bible chu ṭawng 130 chuanga rinawm tak leh dik taka lehlin chhuah a ni tawh a ni. *

Bible hriat thiam awlsam tak mamawh a ni. Hun a lo liam zêl chuan ṭawngte a lo danglam ve zêl a, Bible lehlin tam takah chuan ṭawngkam un leh hriat thiam harsa tak takte a lo awm ta a ni. Chu bâkah, atîra ziak nêna inhnaih zâwk hmân lai kutziak lehkha dik lehzualte chu hmuh chhuah a ni a; chûngte zârah, Bible ziak nâna hman Hebrai te, Aramaic te, leh Grik te chu tûn hma aia hriat thiam lehzual a lo ni ta bawk.

Pathian thu laka rinawm Bible lehlin chu mamawh a ni. Pathian thâwk khum thute thlâksak ai chuan, Bible letlingtute chu atîra thuziak chungah an rinawm tûr a ni. Mahse, ṭawng lehlin tam zâwkah chuan Pathian hming Jehova chu Bible-ah a lang tawh lo.

A Ziaktu chawimawi tlat Bible chu mamawh a ni. (2 Samuela 23:2) A hnuaia lem târ lana kan hmuh angin, New World Translation chuan Jehova hming chu kutziak Bible upa bera vawi 7,000 vêl a lanna hmunah a dah lût leh thlap a ni. (Sâm 83:18) Kum tam tak chhûng taima taka zir chian a nih hnua tihchhuah he Bible hian Pathian ngaihtuahna chu chiang takin a sawi chhuak a; chuvângin, chhiar a nuam hle a ni. New World Translation chu in ṭawngin in nei tawh emaw, in la nei lo emaw pawh ni se, Jehova Thu chu nî tina chhiar ṭhîn tûra hun duan ṭha nei tûrin kan fuih che a ni.—Josua 1:8; Sâm 1:2, 3.

• Engvângin nge Bible lehlin thar kan mamawh tih thu tlûkna kan siam?

• Pathian duhzâwng hre duh apiangte chuan eng nge nî tina an tih ṭhin ang?