Mi jingua in kjuarmagojme dya mi pɇsʼiji Biblia, mi pjongꞹji copia o Biblia kʼo mi pɇsʼi yo ntee. Kʼo Bibliakʼo nge kʼo mi jichiji yo ntee ma mi poji kja o ngunji ñe nge kʼo mi unꞹji yo ntee. Kjanu go unꞹji nguenrra ke ma joo ma ro tsjaji in Bibliagojme. Go pjechiji ke e Jehová nee ke yo ntee “ra mba̱ra̱ji kʼꞹ na kjuana” (1 Timoteo 2:3, 4). Kja kʼe kjɇɇ 1950 go pjongꞹji na parte in Bibliagojme kʼe Traducción del Nuevo Mundo kja idioma inglés. Ndeze kʼe paa asta yo padya, ixi kjogꞹ ciento treinta idioma ba dyopjꞹji ne Biblia. Go dyopjꞹji kʼua ja ga mama yo xiskuama yo mi jingua.

In kjuarmagojme o unꞹji nguenrra ke ma joo ma ro tsjaji na Biblia kʼꞹ ro tendioji na joo. Na punkjꞹ Biblia ya me mezhe ma go tsjaji, go jñusʼꞹji ja ma ñaji kʼo ntee mi jingua, pe nudya dya kja ri ñaji ga kjanu. Kʼo ntee kja go chøtrʼꞹji xiskuama kʼo go dyopjꞹji mi jingua. Kʼo xiskuamakʼo, go mbøsʼꞹ na punkjꞹ yo in kjuarmagojme go mba̱ra̱ji na joo ja ma kjaa yo idioma hebreo, arameo ñe griego. Kʼo idiomakʼo, mi ñaji kʼo ntee mi jingua.

Mi negojme na Biblia ke ro ngeje ja ma nge kʼꞹ bi dyopjꞹji mi jingua. Yo ntee ke opjꞹji ne Biblia kja o idioma nesta ra jñusʼꞹji kʼua ja nzi ba jñusʼꞹji kʼo bʼɇzo kʼo o dyopjꞹji o jñaa e Mizhokjimi mi jingua. Pero kja na punkjꞹ Biblia dya go tsjaji ga kjanu, dya kja go jñusʼꞹji o trju̱u̱ e Mizhokjimi.

Kja in Bibliagojme go jñusʼꞹji pje ni chju̱u̱ Mizhokjimi (2 Samuel 23:2). Ne Biblia Traducción del Nuevo Mundo a ro sⱥtrʼⱥ siete mil bes kʼꞹ go jñusʼꞹji pje ni chju̱u̱ e Mizhokjimi kʼua ja nzi mi junsʼꞹtrjo kja yo skuama mi jingua, jñanrragekʼo kja kʼe fragmento kʼꞹ bʼꞹbʼꞹ anrrꞹbʼꞹ (Salmo 83:18). Go mezhe na punkjꞹ tsjɇɇ pa ro tsjaji nu ne Biblia, o jyodʼꞹji na joo kja na punkjꞹ skuama kʼo a bi dyopjꞹji kʼo ntee mi jingua ngekʼua ro mba̱ra̱ji pje ro jñusʼꞹjinu. Texe kʼo go jñusʼꞹji kja ne Biblia nge kʼo mama Mizhokjimi. Go jñusʼꞹji na joo kʼua ja ga ñajidya, ngekʼua ma ri xørꞹji ne Biblianu ri tendioji na joo. Zo dya gi pɇsʼi ne Biblia Traducción del Nuevo Mundo kja jñatrjo, na joo ke pama pama ri xørꞹ in Biblia kʼꞹ gi pɇsʼi (Josué 1:8; Salmo 1:2, 3).

• ¿Pjekja go pjongꞹji na Biblia yo testigo e Jehová?

• ¿Pje ra kjaji pama pama ngekʼua ra pa̱ra̱ji pje nee e Mizhokjimi ke ra kjaji?