Juebena wasúktiampo, jume Jehovata testígom wate Bíbliam bétanate yala, usarua éntok chíbextiala. Te, tiémpomak atʼte suuwa ke bemela traducción bëyey jume géntemʼmew ka obiáchitunakey emo maxtiá bechïbo, buéytuk Lios “lútüriata am täya ïaa” (1 Timoteo 2:3, 4). Junen bechïbo, 1950po ili rebʼbia jióxterim itom Bíbliata bétana inglés nokipo wëme juka Traducción del Nuevo Mundo tate usáruataytek, iʼi en énriapo jióxtewa bénasi jióxteri éntok wepu ciento ama senu taká ama woy mamni chë ama bepʼpa nokimpo witʼtisim yäri.

Wepu Biblia ka obiachi at jüne bechïbo ama bëyey. Tiémpomak jume nókim tatʼtabuiasim émom jojoá, juebena Bíbliampo jita nókim ka jünakiachim o beja ka usáruawame ama jióxtela éntok máyim obiachi ámet jüne bechïbo. Éntoket, jióxterim antíguom chë originálim béname éntok chë witʼtisi jióxterimim tewla, ime itom aʼania at jüne bechïbo jume nókim usáruawawi Bíbliata jióxteko, ju hebreo, arameo éntok griego.

Wepu traducción bëyey Liosta Nokímak naw aw wériame. Jume kuaktialérom kátim jumu Liosta Noki jióxterimpo jita bem éawi ka ama jióxtena; jachin a jióxteri bénasim a toixna. Júnentak junʼne, juebena Bíbliampo kátim Liosta téwam Jehová ama yéyecha.

Wepu Biblia bëyey wa a Yäkawi yöriwamta a máknake bechïbo (2 Samuel 23:2). Jumu Traducción del Nuevo Mundo po, ju Jehovata téwam batʼte woy busan mil téxtom ama wénakëpo júchim a jióxtela, jachin jumu jióxterim antíguom wëme bénasi, wepu ejemplo imi bétuk weyʼye (Salmo 83:18). Yun wasúktiriampo, tüysim yun jita investigáruaka ika Bíbliatam yew jimʼmak, tüysi éaka leleéruawa buéytuk Liosta éamta jünakiachisi itómam bitʼtebo. Eláposu en nokipo a jípurëteko o ka a jípurëteko junʼne, enchite néjune chikti täpo Jehovata Nókim leéruanake bechïbo (Josué 1:8; Salmo 1:2, 3).

• ¿Jatchiasu yawʼwak wepu bemela versión Bíbliata bétana jipu bechïbo?

• ¿Jítasu chikti täpo yánake wame Liosta wátiaw bétana jüne báreme?