Myaakha cinci uttuli, Masaahiti a Yehova ahovarelaka nteko, ahempirimiri ni ahokawa Ibiiblya cootaphuleliya naatthu akhwaawe. Masi nahoona wiira khiyaarivo Ibiiblya yaahala waakavihera cinene atthu ‘ucuwela ikhweeli’ ya Nluku, itthu Nluku impheelaawe uwoona atthu otheene acuwelaka. (1 Timotiyu 2:3, 4) Vano, ikhumelo mwaakha wo 1950, nihancera ukumihera miphantte co Ibiiblyeehu Tradução do Novo Mundo, irina moolumo oohirika wiiweeha. Ila Ibiiblyeela ihotaphuleliya sana-saana ni iluuka coopwahaka 130.

Yaahana ikhalaka Ibiiblya yoohirika wiiweeha. Waviraka ukati mwinci mananna owuulumiya anaavirikana, ni Ibiiblya cinci nanlelo cirina moolumo oorika wiiweeha ni ahinoolumiya mahukwaala. Uhiya commo, cihooneneliya ilivuru cokhalayi cinhimya ikhweeli combiiblyani ni cihinvirikana ni ilivuru coopacera combiiblyani, cinuncerera wiiweeha Ibiiblya yowantikhiya niiluuka iheperewu, aramayiku ni ikereeku.

Khayaarivo Ibiiblya yoohimya saana ikhweeli ya Nluku. Antaphulela Ibiiblya khanlamuliya wuncerera awula uvukula moolumo a Nluku, masi ahaana wootaphulela attharihelelaka ile inhimyaaya ilivuru coopacera. Unookhalaru commo, ncina na Nluku, Yehova, khanimphwanyannya nhina Cowantikhiya Cowaarya cinci cirivo.

Yahaana ikhalaka Ibiiblya yaahala unhimyaca mwaneene. (2 Samuweli 23:2) Mbiiblyani Tradução do Novo Mundo, ncina na Yehova nihoturuseliya mmapuroni ookhalaka 7.000 naaphwanyannyaaya nhina ilivuru cokhalayi co Ibiiblya, toko citakiheraciyaaya ninthoonyero niri vathi va. (Isaalimu 83:18) Uvira waya myaakha cinci itothiyaka sana-saana ikhweeli ya Nluku, ihooryaanihiya upankiya Ibiiblya yooreera usoma, ukhala wiira inaahimya ratta muupuwelo a Nluku. Nkhalane awula nhikhalane Ibiiblya Tradução do Novo Mundo niiluuka inoolumeenyu, hiiva ninawuusovenrihani usoma Nuulumo na Yehova khula nihuku.—Josuwe 1:8; Isaalimu 1:2, 3.

• Nlattuni nilakenleehu utaphulela Ibiiblya yo naanaano?

• Isiyani inlamuliyaawe upanka khula nihuku ule nopheela ucuwela ile inoncivela Nluku?