ISAMBILILO 4
U Mulandu ci Uno Twapangila Baibo Yakuti Amalembo ya Calo Cipya?
Congo (Kinshasa)
Ku Rwanda
Cipande cino Symmachus walemvile pano paya izina lyakwe Leza pali Masamu 69:31, ku myaka ya 200 C.E.
Pa myaka iingi cuze, ya Nte Yakwe Yeova yaomvyanga Mabaibo apusane-pusane, nupya ali yano yapulintanga nu kupulinta, alino nu kupeela antu. Nomba, twaweni ukuti cikulondekwa ukupanga Baibo yangupale iingazwa antu ukusambilila icumi, pano aali vino Leza akaalonda ukuti antu yonsi yamanye icumi. (1 Timoti 2:3, 4) Acino, umu 1950 twamazile ukusenulako amabuku yamwi-yamwi amuli Baibo ino ndakai tukati Amalembo ya Calo Cipya. Baibo yii yasenulwa ningo sana ukukonka vivi kwene vino yalemvilwe pa kutandika; yasenulwa umu ndimi ukuluta pali 130.
Kwalondekwanga Baibo iyangupale ukuvwa. Nga papita imyaka, indimi zikasenuka, alino umu Mabaibo aingi yano yasenula, mwaya amazwi aasiuvwika, na akuti pa nsita yii yasiomba nu kuomba, lyene cikatala ukuvwa ivilemvilwe. Alino na cuze i cakuti, ndakai kwazanwa impapulo zya mpiti sana izyalemvilwe ningo ukulingana na vino Izwi Lyakwe Leza lyalemvilwe, i zikatwavwa ukuvwikisya indimi zino Baibo yalembiilwemo izya ciYebulai, ciAlamaiki, ni ciGliki.
Kwalondekwanga Baibo iitavulunganya izwi lyakwe Leza. Aakusenula Baibo yatafwile ukulemba sile vino yakulonda; yalinzile ukulemba ukulingana na vino amazwi ya nkoleelo yaali. Nomba, umu Mabaibo aingi yafuutamo izina lyakwe Leza, ilyakuti Yeova.
Kwalondekwanga Baibo iikacindika Uwaipanzile. (2 Samueli 23:2) Muli Baibo yakuti Amalembo ya Calo Cipya, mwaya izina, Yeova, kulingana na vino impapulo zya mpiti sana zikalanga amaila apipi na 7,000 ndi vino mukulola apa cikope icili apisika. (Masamu 83:18) Aasenulanga Baibo yi yaomvile sana pa myaka iingi icakuti na vino yasenwile vikauvwika ningo nga mukuwelenga, cika-avwa nu kuvwikisya amazwi yakwe Leza. Nanti mwakwata Baibo yakuti Amalembo ya Calo Cipya umu lulimi lwinu nanti foo, cino tukumukomelezya i cakuti mwawelenga Izwi Lyakwe Yeova cila-wanda.—Yoswa 1:8; Masamu 1:2, 3.
-
U mulandu ci uno twapingwililepo ukusenula Baibo ipya?
-
I vintu ci ivisuma vino cila-muntu alinzile ukucita cila-wanda pa kuti amanye vino Leza akaalonda?
Limwi Mungatemwa Ukulolako na Vii
KUPANGA NU KUSALANGANYA IMPAPULO
Yapeelwa Umulimo wa Kusenula “Mazwi Yakwe Leza”—Loma 3:2
Ya Nte Yakwe Yeova yaomvya Mabaibo aingi pa myaka 100 yapita. U mulandu ci uno yapingwilile ukusenula Baibo mu Cizungu icikaomviwa ndakai?
BAIBO
Baibo Uwa Malembo ya Nsi Ipya
Lolini ivyaya umu Malembo ya Nsi Ipya, Baibo uwa cumi nupya umwangupale ukubelenga.
