Шуко ий мучко Иегован Таныкше-влак Библийын тӱрлӧ кусарымашыжым кучылтыныт, савыктен луктыныт да шаркаленыт. Жап эртымеке, чыным сайрак умылаш полшышо кусарымашын кӱлешлыкше лектын. Вет Юмын эрыкше почеш кажне айдеме Библий гыч чыным раш умылышаш (1 Тимофейлан 2:3, 4, УТ). Тыге, 1950-ше ийыште англичан йылме дене «У тӱнян кусарымашыште» Библийын ик ужашыже лектын. Ту жапыште илыше-влаклан тиде кусарымашым умылаш куштылгырак лийын. Библийын «У тӱнян кусарымашыже» чын да умылаш куштылго, тудым 160 утла йылме дене лудаш лиеш *.

Умылаш куштылго Библий кӱлеш. Жап эртымеке, кеч-могай йылме вашталтеш, мут-влак тоштемыт, сандене кусарымаш-влакым уэмдаш кӱлеш. Тыгак мемнан кечылаште Библийын оригиналже деке лишкырак шогышо ожнысо кидвозыш-влакым муыныт. Нунылан кӧра тошто еврей, арамей да грек йылме дене возымо библийысе текстым сайрак умылаш лийын.

Юмын шомакшым чын каласыше кусарымаш кӱлеш. Библийым кусарыше-влак Юмын шӱлышыжӧ кумылаҥдыме почеш возымо текстым вашталтышаш огытыл. Нунын кусарымашышт оригинальный текстлан тӱрыснек келшен толшаш. Чаманаш логалеш, шуко кусарымаш гыч Юмын лӱмжым, Иегова, кораҥденыт.

Авторжым чапландарыше Библий кӱлеш (2 Самуила 23:2). «У тӱнян кусарымаште» Иегован лӱмжым кушто лийшаш, чыла вере пуртымо. Ожнысо библийысе кидвозышлаште тудо 7 000 наре гана вашлиялтеш (Тӱҥалтыш 22:14). Ик тыгай кидвозышын ужашыжым ӱлнӧ ончыктымо. Шуко ий шуйнышо келге шымлымашлан кӧра кусарыше-влак Юмын шонымашыжым раш кусарен кертыныт. Тыгай Библийым лудаш куштылго да кумылат уло. Тендан йылме дене тиде кусарымаш лектын огыл гынат, ме тендам Иегован Мутшым кажне кечын лудаш кумылаҥдена (Иисус Навин 1:8; Псалом 1:2, 3).

• Таныкше-влакым Библийын у кусарымашыжым лукташ мо таратен?

• Юмын эрыкшым пален налаш шонышылан кажне кечын мом ышташ кӱлеш?