Ipan miak xiuitl tijchijkej, tijtekiuijkej uan tijmoyajkej sekinok Biblias. Teipa tikitakej monekiyaya tijpiasej se yankuik Biblia tlen kichiuaskia amo ouij “ma kimatikaj tlen nelia melauak”, ya ni kineki toTeotsij ma kimatikaj nochi (1 Timoteo 2:3, 4). Yeka, ipan xiuitl 1950 pejki mochiua ipan tlajtoli inglés se keski pilamochtsitsij katli uala ipan Biblia kej nama kamanaltij. Ni itoka Traducción del Nuevo Mundo, uan xitlauak motlajtolkueptok ipan kipano 130 tlajtoli.

Monekiyaya se Biblia tlen amo ouij kikuamachiliskiaj. Nochi tlajtoli mopatla kej panotia tonali, yeka ipan miak Biblias tlen motlajtolkueptok kipia tlajtoli tlen ayokmo motekiuia o ouij se kikuamachilia. Nojkia kiasitokej tlajkuiloli tlen kinextia uejkajkia kiijkuilojkej Biblia, ni kichiua amo ouij ma mokuamachili toTeotsij iTlajtol tlen moijkuilok ipan hebreo, arameo uan griego.

Monekiyaya xitlauak motlajtolkuepas toTeotsij iTlajtol. Katli tlajtolkuepaj amo kinamiki kipatlasej nopa tlajtoli tlen toTeotsij kichijki ma moijkuilo, moneki xitlauak kitlajtolkuepasej Biblia. Maske ya nopa moneki, miakej katli kitlajtolkueptokej toTeotsij iTlajtol amo kitekiuiaj toTeotsij Jehová itoka.

Monekiyaya se Biblia tlen kiueyichiuaskia toTeotsij (2 Samuel 23:2). Ipan Traducción del Nuevo Mundo, motekiuia nopa tokajyotl Jehová nechka siete mil, kej nesi kema uejkajkia kiijkuilojkej Biblia. Tlatsintla kiixkopintokej kenijkatsa nesiyaya (Salmo 83:18, TNM). Kema kitlajtolkuepkej ni Biblia monejki miak xiuitl tlauel kuali momachtisej, yeka nama tijpouaj ika pakilistli pampa xitlauak tijkuamachiliaj tlen toTeotsij kiijtoua. Tlaj tijpia Biblia ipan motlajtol o amo, kualtiaskia timomatis tijpouas mojmostla (Josué 1:8; Salmo 1:2, 3).

• ¿Kenke monekiyaya tijpiasej se yankuik Biblia?

• Tlaj tijnekij tijmatisej tlake kineki toTeotsij ma tijchiuakaj, ¿tlake moneki timomatisej mojmostla tijchiuasej?