Itech miak xiujmej, tiitaixpantijkauan Jiova tikixtijkej, tiktekitiltijkej uan tikmoyaujkej tataman Biblias. Sayoj ke, satepan tikitakej ke monekia se yankuik Biblia tein kinpaleuiskia taltikpakneminij maj okachi amo ouij ‘kiajsikamatikan in melauak Tajtoltsin de Dios’, ta Dios kineki maj nochin taltikpakneminij kipiakan nejon taixmatilis (1 Timoteo 2:3, 4). Yejua ika, itech xiuit 1950 tipeujkej tikixtiaj seki amatajkuilolmej tein kipia Biblia itech tajtol inglés uan moijkuiloj kemej axkan motajtoua, nejin yejua Traducción del Nuevo Mundo. Nejin Biblia kikepkejya, uan amo mopatak nion se tanemilil, itech panoua ciento treinta tataman tajtolmej.

Monekia se Biblia tein amo ouij moajsikamatis. Tajtolmej mopatatiyouij kemej panouaj tonalmej, uan miak Biblias kipiaj tajtolmej tein amo moajsikamatijok oso tein amo mokuijok uan ouij moajsikamati. Uan no, moajsinij seki uejkauj tajkuilolmej tein okachi ajsitok tanemililmej kipiaj, tein tapaleuia maj okachi moajsikamati tajtol hebreo, arameo uan griego kemej yekinika moijkuiloj Biblia.

Monekia se Biblia kampa amo kipatiliskiaj tein Dios kijtojka. Akin kikepaj Biblia amo ueli kipatiliaj tein Dios kijtoj maj moijkuilo; moneki kichijchiuaskej ijkon kemej yekinika moijkuiloj. Sayoj ke itech miak Biblias amo motekitiltia itokay Dios, Jiova.

Monekia se Biblia tein kiueyitalis Dios (2 Samuel 23:2). Itech Traducción del Nuevo Mundo, itokay Jiova oksepa moijkuiloj kampa ipa ixnesia itech uejkauj tajkuilolmej uan ajsi kemej siete mil, se neskayot yejua tein tatsintan ixnesi (Salmo 83:18). Kichijchiujkej ika miak nejmachkayot uan miak xiujmej motelmachtijkej uan tatemojkej keniuj kikepaskej nejin Biblia, yejua ika kualtsin temaka pakilis tikixtajtoltiskej porin kuali kijtoua tein kinemilia Dios. Komo tejuatsin tikonpia se oso amo tikonpia se itech motajtol, timitsonyoleuaj xikonixtajtolti iTajtol Jiova mojmostaj (Josué 1:8; Salmo 1:2, 3).

• ¿Keyej tikitakej ke monekia se yankuik Biblia?

• ¿Toni moneki kichiuas mojmostaj akin kineki kimatis katiyejua itanejnekilis Dios?