Pan miak xiwiʼ, yej nitajto̱lmoya̱waj de Jehová niki̱xtijkej pan a̱maʼ sekin Biblias yej onoyaj, wan no̱ niknentijkej wan nikmoya̱wakej. Pero después nikitakej iga monekiá seuʼ Biblia yej makipale̱wi la gente «makiye̱ʼixmatikan yej melá̱», iní̱n yej Dios kineki iga nochimej (1 Timoteo 2:3, 4). Inó̱n iga, pan 1950 moki̱xtij achi de iní̱n Biblia pan tajto̱l yej manin moojasi (o moikpaasi) pan inglés, yej moto̱ka̱wiá la Traducción del Nuevo Mundo, iní̱n Biblia akipolowa nité̱. Wan iní̱n Biblia moki̱xtiá pan ma̱j de ciento treinta tajto̱lmej.

Monekiá se̱ Biblia yej mamo-ojasi o mamoikpaasi imaní̱n. Nochi tajto̱lmej mopatatiá ken panotiá xiwimej, wan miak Biblias kipiáj tajto̱lmej yej amo-ojasi. Wan no̱ kasikej ikiapa a̱mamej de Itajto̱l Dios, yej ijko̱nsan ken achto moijkuiloj. Iní̱n te̱pale̱wiá matikojasikan Biblia yej moijkuiloj pan hebreo, arameo wan griego.

Monekiá se̱ Biblia yej makipiasan itajla̱mikilis Dios. Yej kichijkej iní̱n Biblia monekiá makijkuilo̱kan ijkó̱n ken achto moijkuiloj Itajto̱l Dios wan amo makijkuilo̱kan itajla̱mikilis de yejeme̱n. Pero pan sekin Biblias akijkuilo̱waj ito̱ka̱ Dios, Jehová.

Monekiá se̱ Biblia yej makiweyichi̱wa Dios (2 Samuel 23:2). Pan Traducción del Nuevo Mundo moijkuiloj seuʼ biáj ito̱ka̱ Jehová pan casi siete mil textos, ijkó̱n ken ne̱si pan ikiapa a̱mamej kan moijkuiloj Itajto̱l Dios, tani wel tikita se̱ ne̱xtilis de iní̱n (Salmo 83:18). Yej kichijkej iní̱n Biblia, motekitilijkej wan moye̱ʼmachtijkej miak xiwiʼ. Inó̱n iga tipa̱kij kua̱ tiktajto̱ltiáj iga te̱pale̱wiá matikojasikan itajla̱mikilis Dios. Siga tikpiá iní̱n Biblia pan motajto̱l o ayá̱, nimitsijliáj iga nochipa xiktajto̱lti Itajto̱l Jehová ( Josué 1:8; Salmo 1:2, 3).

• ¿Tejas tiknekiáj seuʼ Biblia?

• Si tikmatisnekij te̱ kineki Dios, ¿te̱ moneki matikchi̱wakan?