Dihlatse tša Jehofa di tšere nywagasome di diriša, di gatiša le go aba diphetolelo tše di fapafapanego tša Beibele. Eupša ka morago re ile ra bona go nyakega gore go tšweletšwe phetolelo e mpsha yeo e bego e tla thuša batho kudu go ithuta ‘tsebo e nepagetšego ya therešo,’ e lego thato ya Modimo bakeng sa batho bohle. (1 Timotheo 2:3, 4) Ka gona, ka 1950 re ile ra thoma go lokolla dikarolo tša Beibele ya rena ya leleme la mehleng yeno, ya Phetolelo ya Lefase le Lefsa. Beibele ye e fetoletšwe ka potego le ka mo go nepagetšego ka maleme a ka godimo ga a 120.

Go be go nyakega Beibele e kwešišegago gabonolo. Ge nako e dutše e eya maleme a a fetoga, gomme diphetolelo tše dintši di na le dipolelwana tše di sa kwagalego goba tše di fetilwego ke nako tšeo go lego thata go di kwešiša. Le gona, go utolotšwe dingwalwa tše dingwe tše di nepagetšego tša bogologolo le tšeo di lego kgauswi le dingwalwa tša mathomong, e lego seo se feleleditšego ka kwešišo e kaone ya maleme a Beibele a Seheberu, Searama le Segerika.

Go be go nyakega phetolelo yeo e bego e botegela lentšu la Modimo. Go e na le go itirela boithatelo ka mangwalo a buduletšwego a Modimo, bafetoledi ba Beibele ba swanetše go botegela dingwalwa tša mathomong. Lega go le bjalo, diphetolelong tše dintši, leina la Modimo la Jehofa ga le dirišwe ka Mangwalong a Makgethwa.

Go be go nyakega Beibele yeo e godišago Mongwadi wa yona. (2 Samuele 23:2) Ka go Phetolelo ya Lefase le Lefsa, leina la Jehofa le bušeditšwe moo le tšwelelago gona ka makga a ka bago a 7 000 dingwalweng tša bogologolo tša Beibele bjalo ka ge go bontšhitšwe mohlaleng o lego ka mo tlase. (Psalme 83:18) Go a thabiša go bala Beibele ye ka ge e tšweletša dikgopolo tša Modimo ka mo go kwalago ka morago ga gore go tšewe nywaga e mentši go dirwa nyakišišo e tseneletšego. Go sa šetšwe gore o na le Phetolelo ya Lefase le Lefsa ka leleme la geno goba go se bjalo, re go kgothaletša gore o be le lenaneo le lebotse la go bala Lentšu la Jehofa letšatši le lengwe le le lengwe.—Joshua 1:8; Psalme 1:2, 3.

• Ke ka baka la’ng re ile ra dira phetho ya gore go nyakega phetolelo e mpsha ya Beibele?

• Ke mokgwa ofe o mobotse wa letšatši le letšatši o loketšego motho le ge e le ofe yo a nyakago go ithuta thato ya Modimo?