BÍHWIIDOOʼÁŁÍGÍÍ 4
Haʼátʼíísh Biniyé New World Translation Ádeiilyaa?
Congodi (Kinshasa)
Rwandadi
Jesus daaztsą́ bikéédóó 300 doodaiiʼ 400 yihah góneʼ díí naaltsoos Symmachus áłtsʼíísígo elkidígíí Psalm 69:31gi God bízhiʼ bikááʼ
Diyin God Bizaad daʼníłtsʼą́ą́dę́ę́ʼ danéiidéhígíí Jiihóvah Yá Dahalneʼé chodayosʼı̨́ı̨́d, yéédaʼiidlaa, dóó nideiniihgo ląʼí nááhai. God íinízinii éí tʼááʼałtso diné hazhóʼó “tʼááʼaaníinii bił béédahodoozįįł” biniyé bizaad hazhóʼó háádidoolnííł hwiniidzı̨́ı̨́ʼ. (1 Timothy 2:3, 4) 1950 dóó wóshdę́ę́ʼ saad doo nantłʼago bee yátiʼígíí Diyin God Bizaad nínilgo ahíłkééʼ ályaa. Éí New World Translation wolyé. Díí Diyin God Bizaadígíí éí tʼáá átʼéhę́ęgi átʼéego 130 dóó baʼaan saad ałʼąą ádaatʼéego bee háádadilyaa. *
Diyin God Bizaad nizhónígo bikʼidiʼdootı̨́ı̨́łígíí łaʼ hwiniidzı̨́ı̨́ʼ. Saad łah ánáaʼníiłgo bił hoolzhish, áko ałʼąą ádaatʼéego Diyin God Bizaad danéiidéhígíí łaʼ doo hazhóʼó béédahózin da. Doodaiiʼ ałkʼidą́ą́ʼ saad chodaoʼínę́ę dabiyiʼígíí biniinaa bikʼidiʼdootı̨́ı̨́łgi ayóonanitłʼah. Ałkʼidą́ą́ʼ Diyin God Bizaad bikʼedaʼashchı̨́įgo danéiidééhę́ę bikʼínáʼneetą́ą́ʼ. Éí binahjįʼ Diyin God Bizaad átséedi Hííbrew, Aramaic, dóó Gríikjí saad bee hadilyaa yę́ę nizhónígo bééʼdeetą́.
God yinízinígi átʼéego Diyin God Bizaad háádidoolnííł hwiniidzı̨́ı̨́ʼ. God bintsíkees kʼehgo akʼedaʼashchínígíí éí doo tʼáá hó ádaaznízinígi átʼéego ádazhdoolííł da. Ndi éí tsʼídá átséedi bikʼedaʼaschínée átʼéhę́ęgi átʼéego ádazhdoolííł. Ákondi, ląʼígóó Diyin God Bizaad danéiidéhígíí diyin bízhiʼ Jiihóvah doo biiʼ daasdzoh da.
Diyin God Bizaad Haidiilaaígíí baa haʼniih doo biniyé łaʼ háádidoolnííł hwiniidzı̨́ı̨́ʼ. (2 Samuel 23:2) Wóyahgi elkidígi átʼéego, 7,000 dóó baʼaan ánéelą́ąʼdi Diyin God Bizaad ałkʼidą́ą́ʼ akʼedaʼaschínígíí Jiihóvah bízhiʼ dabiyiʼ yę́ęgi New World Translation biih nídaasdzoh. (Psalm 68:4) Díkwííshı̨́ı̨́ nááhai tʼááʼíiyisíí yéigo naaskááʼ. Áko díí Diyin God Bizaadígíí baa hózhǫ́ǫgo wóltaʼ, éí tʼáadoo baa hatʼaadí God bintsíkees kʼehgo ályaa. Azhą́shı̨́ı̨́ New World Translation doo łaʼ neihólǫ́ da ndi, Jiihóvah Bizaad tʼááʼákwííjı̨́ néíníłtah doo ná daniidzin.—Joshua 1:8; Psalm 1:2, 3.
[Footnote]
^ par. 3 New World Translation diné kʼehjí tʼahdoo álnéeh da. Ákótʼée ndi Bilagáana doodaiiʼ łahdę́ę́ʼ nááná saad bee ádaalyaaígíí níkáʼadoolwołgo átʼé.
-
Haʼátʼíísh biniyé New World Translation ádoolnííł daniidzı̨́ı̨́ʼ?
-
Tʼáá háiida God íinízinii bíhodeeshʼááł nízinígíí éí haʼátʼíísh tʼááʼákwííjı̨́ ájooníiłgo há yáʼátʼéeh doo?
