Ukwanda kunyuma kosa uku, twabombelagha amaBaibolo ghakukindanakindana. Loli twalyaghile ukuti tulondiwa ukuya ni Baibolo ili libaghile ubatula abandu ‘ufikapo pakubumanya kanunu ubwanaloli.’ (1 Timoti 2:3, 4) Mu chinja cha 1950 po apa twalyandile ukusanusya ifiyaba fimo fya Baibolo mu njobelo ya lino. IBaibolo ili lisanusiwe kanunu fiyo mu njobelo syakukinda 130.

IBaibolo ilipepe lyakuti tupilikisyeghe kanunu lyalondiwagha. Injobelo yuchenja linga akabalilo kakindilepo, yo nongwa amasiku agha amaBaibolo mingi ghotamya ughapilikisya. Ukwaghiwa kwa mabuku amakulu kwabatulile fiyo aba basanusyagha iBaibolo. Amabuku agha ghafwene fiyo na masimbo aghabwandilo. Ghabatulile ukuti bapilikisye kanunu amasimbo agha ghalembiwe mu njobelo ya Chihiburi, Chiaramu ni Chigiriki.

Ukusanusya amasyu gha Kyala mwakusubiliwa kwalondiwagha. Aba bosanusya ama Baibolo, bolondiwa ukuti bayeghe basubiliwa linga bosanusya amasyu gha Kyala. Loli m’maBaibolo mingi ingamu ya Kyala yakuti Yehova yisosiwemo.

IBaibolo lya kungindika Kyala witu lyalondiwagha. (2 Samueli 23:2) Mu Baibolo lya ili ingamu ya Kyala yakuti Yehova yighomokesiwemo m’malo 7,000 ufwana namuno fyayilile m’maBaibolo mingi aghabwandilo. Keta ichithuzithuzi pasi apa. (Masalimo 83:18) Nongwa yakuti imbombo yakufufuza iBaibolo yalyendile kanunu, iBaibolo ili lipepe ubelenga. Liyoba kanunu inyinoghono sya Kyala. Linga muli nalyo iBaibolo ili * tubasuma ukuti mulibelengeghe. Linga mubombela iBaibolo ilingi, pope tubasuma ukuti muye nakabalilo kakulibelenga isiku lililyosa.—Yoswa 1:8; Masalimo 1:2, 3.

• Nongwa yafiki twalinowine ukuti tusanusye iBaibolo?

• Ngimba findu fiki ifinunu ifi tulondiwa ubomba, ukuti tumanye ubwighane bwa Kyala?