سبق 4
اَسی بائبل دا ترجمہ کیوں تیار کیتا؟
کانگو
روانڈا
تیسری یاں چوتھی صدی عیسوی دے اِک نسخے دا ٹکڑا جدے وچ زبور 69:31 وچ خدا دا ناں یہوواہ لکھیا ہویا اے۔
کئی سالاں تک یہوواہ دے گواہ بائبل دے فرق فرق ترجمے چھاپدے، ونڈدے تے استمال کردے رہے۔ پر فیر سانوں اِک ایسا ترجمہ تیار کرن دی لوڑ محسوس ہوئی جدے ذریعے سارے لوک سچائی سکھ سکن۔ خدا دی وی ایہو ای مرضی اے کہ ہر طرحاں دے لوک سچائی بارے صحی علم حاصل کرن۔ (1-تیمُتھیُس 2:3، 4) ایس لئی اَسی 1950ء توں بائبل دا انگریزی وچ ترجمہ کرنا شروع کیتا۔ ایس ترجمے دا ناں ”ترجمہ نئی دُنیا“ اے۔ ہُن تک اَسی بائبل دا 130 توں زیادہ زباناں وچ صحی صحی ترجمہ کیتا اے تاکہ لوک خدا دا کلام اسانی نال سمجھ سکن۔
اِک سوکھے ترجمے دی لوڑ سی۔ وقت دے نال نال زباناں بدل دیاں رہندیاں نیں۔ ایہدے علاوہ بائبل دے کئی ترجمیاں وچ پرانی تے بوہت اوکھی زبان استمال کیتی گئی اے جیہڑی اَج لوکاں نُوں سمجھ نئیں آؤندی۔ کجھ عرصہ پہلے بائبل دے ایسے نسخے وی ملے نیں جیہڑے پاک کلام دے اصل نسخیاں نال زیادہ میل کھاندے نیں۔ اَسی ایہناں نسخیاں دی مدد نال پرانی عبرانی، ارامی تے یونانی زبان نُوں ہور چنگی طرحاں سمجھ سکنے آں۔
خدا دے پیغام نُوں ایمانداری نال بیان کرن والے ترجمے دی لوڑ سی۔ خدا دے کلام دا ترجمہ کرن والیاں نُوں نہ تے ایہدے وچ کجھ ودھاؤنا تے نہ ای کجھ گھٹاؤنا چاہیدا اے۔ سگوں اوہناں نُوں ایمانداری نال پاک کلام دا صحی صحی ترجمہ کرنا چاہیدا اے۔ پر ایہہ بڑے دُکھ دی گل اے کہ بوہت سارے ترجمیاں وچوں خدا دا پاک ناں یہوواہ کڈھ دِتا گیا اے۔
خدا دی وڈیائی کرن والے ترجمے دی لوڑ سی۔ (2-سموئیل 23:2) بائبل دے سب توں پرانے نسخیاں وچ خدا دا ناں یہوواہ کوئی 7000 واری آیا سی۔ ”ترجمہ نئی دُنیا“ وچ ایہہ ناں دُبارہ اوہناں ساریاں تھانواں تے پا دِتا گیا اے جِتھے جِتھے اصل وچ ایہہ آیا سی۔ مثال لئی ہیٹھاں دِتی گئی تصویر وچ اِک پرانا نسخہ ویکھو۔ (زبور 83:18) کئی سالاں دی کڑی محنت توں بعد ”ترجمہ نئی دُنیا“ تیار ہویا۔ بے شک توانوں ایہہ ترجمہ پڑھ کے بوہت مزہ آئے گا کیونکہ ایہدے ذریعے تُسی خدا دی سوچ نُوں صحی طرحاں سمجھ سکو گے۔ بھانویں تواڈے کول اپنی زبان وچ ”ترجمہ نئی دُنیا“ ہے یاں نئیں، اَسی تواڈی حوصلہ افزائی کرنے آں کہ تُسی یہوواہ خدا دا کلام ہر روز پڑھو۔—یشوع 1:8؛ زبور 1:2، 3۔
-
اَسی بائبل دا ترجمہ کیوں تیار کیتا؟
-
سانوں ہر روز خدا دی مرضی بارے جانن لئی کیہہ کرن دی لوڑ اے؟