Imar but berša le Jehovaskere svedki genenas, tlačinenas a davkerenas e Biblija le manušen. Ale le beršenca avľam pre ada, hoj kampel te prethovel e Biblija avka, kaj o manuša presňe te rozuminen o čačipen pal ada, so o Del kamel te kerel prekal o manuša. (1. Timotejovi 2:3, 4) Beršestar 1950, chudňam postupňe te del avri nevo preklados la Biblijakero. Adi Biblija hiňi prethoďi presňe. Adaďives o manuša la šaj genen andro buter sar 130 čhiba.

Hin lake lokes te rozuminel. Adaďives pes na del duma avka, sar vakerenas o manuša čirla angle amende. Sar prethovenas e Biblija, pisinenas varesave lava, so hine adaďives phurikane a hin lenge phares te achaľol. Le beršenca arakhle aver phurikane biblicka zvitki, so pomožinen feder te achaľol le čhibenge, andre save e Biblija pisinenas, čiže biblicka hebrejska, aramejska the grecka čhibake a feder te prethovel biblicko tekstos presňe pal o phurikane zvitki.

Na previsarel le Devleskere lava. Ko prethovel e Biblija andre aver čhib, mušinel pes presňe te ľikerel, so hin pisimen andro phurikane zvitki. Ňič te na prithovel, aňi te na odlel. Ale varesave, so prethoven e Biblija, mukhen avri le Devleskero menos Jehovas.

Sikavel e paťiv le autoriske, le Devleske. (2. Samuelova 23:2) Andre amari Biblija šaj arakhen asi pro 7000 thana le Devleskero menos Jehovas, presňe avka, sar sas andro phurikane biblicka zvitki. Jekh than šaj dikhen pro obrazkos. (Žalm 83:18) Kampelas but berša, kaj pes mište te preskuminen savore biblicka zvitki. Adi buťi anďa baro užitkos. Akana šaj radišagoha genas adi Biblija, so amenge jasňe del te sprindžarel le Devleskeri goďi. Či tumen hin adi Biblija andre tumari čhib abo na, prisikhľon tumenge te genel sako ďives le Jehovaskero lav, e Biblija. (Jozua 1:8; Žalm 1:2, 3)

• Soske avľam pre ada, hoj kampel te prethovel e Biblija?

• So mušinel sako ďives te kerel o manuš, kaj mište te prindžarel, so kamel o Del?