Yihowa Farciˈraasine haammata diro addi addita Qullaawu Maxaafi tiro horoonsidhanni, attantanni, hattono mannaho tuqissanni keeshshitino. Yannate gedensaanni kayinni, mannu “halaalunnita gara ikkitino egenno” afiˈranno gede roore kaaˈlitannoti Qullaawu Maxaafi tiro hasiissinota wodanchinummo; Maganu qole mannu baalunku togoo egenno afiˈrara hasiˈranno. (1 Ximootewosi 2:3, 4) Konni daafira, 1950nni Haaro Alame Tiro yinannita huwatate qarrissannokkita Qullaawu Maxaafi tiro gama gafa qixxeessinummo. Hakkuyinku tenne tiro 130 saˈˈanno afiinni Maganu Qaali hedo mommodditukki qixxeessinanni keeshshinoommo.

Huwatate qarrissannokkiti Qullaawu Maxaafi tiro hasiissino. Mannu coyiˈranno qaali yannate kiiro soorramanno; qoleno, batinye Qullaawu Maxaafi tiro huwatate qarrissannotanna akkala qaalla horoonsidhanno. Hakkiinni saeno angatenni borreessinoonnita, roore gara ikkitino hedo amaddinota, hattono hundite Qullaawa Borro hedowa shiqqi yitannota biˈree borro anfoonni; tini qolte Qullaawu Maxaafi borreessaminoha Ibiraawootu, Aremayiketenna Giriikete afoo roore huwatate kaaˈlitino.

Maganu Qaale soorramikki kultanno tiro hasiissino. Qullaawa Maxaafa tirtannori, ayyaanu massageenna borreessaminoha Maganu Qaale baxisinsa gede soorritukki biˈre noo garinni tira hasiissannonsa. Ikkollana, Qullaawa Maxaafa tirtinori rooriidi mannooti Yihowa yinanniha Maganu suˈma Qullaawa Borro giddonni fushshite hooltino.

Qullaawu Maxaafi Annira ayirrinye abbitanno tiro hasiissino. (2 Saamueeli 23:2) Konni woroonni noo misile leellishshannonte gede, Haaro Alame Tiro Yihowa suˈma hunda angatenni borreessinoonni tirora noo garinni, yaano 7,000 ikkitanno basera galagalte eessitino. (Faarso 83:18) Lowo diro diinaggaambe xiinxalline qixxeessinoonniti tini Qullaawu Maxaafi tiro Maganu hedo xawisse kultanno daafira, hagiidhinanni nabbambannite. Haaro Alame Tiro ati coyiˈratto afiinni qixxaabbinoha ikkono ikkano hoogo, Yihowa Qaale barru baala nabbawa roso assiˈratto gede amaalleemmohe.—Iyyaasu 1:8; Faarso 1:2, 3.

• Haaro Qullaawu Maxaafi tiro qixxeessate kaˈneemmo gede assinonkehu maati?

• Maganu fajjo maatiro afa hasiˈranno manni baalunku barru tuqa ma assiro danchaho?