Miaka iingi yapitile, twabombiizie ni kufumia ku mapapie kabili ni kubapeela bantu mpilibulo paleepale ya Bibilia. Kupwako, twamweene nangue kipalile kuleemba mpilibulo ya leenu eevi ikwasie kila muntu eenike ni “kumana kisinka [kisiliimo kilubo],” nga vitonene Leeza. (1 Timoteo 2:3, 4) Kufikiila muaka wa 1950, twabambile kufumia Tafsiri ya Ulimwengu Mupya (Mpilibulo ya Kyalo kya Leenu) mu Kingereza yali mu bipitu-bipitu. Eezi Bibilia yapilibuilue mu kisinka, bila kilubo, mu ndimi ya leenu, ikilile pa 170.

Mpilibulo ya Bibilia ileengele kuunvuika. Paantu ndimi ili mukwaluluka, mpilibulo iingi ilimo bulanzi busimanikile, busiizi kubombiiwa, kabili bwakolele kuunvuika. Kangeko, maleembo a kale saana, ali mukuvumbulua kabili a kisinka, apalameene ni a kuanza, ali mukukwasia kuunvua bwino Kiebrania, Kiaramu, ni Kigiriki kya mu Bibilia.

Mpilibulo ya kisinka isialuluile mpunda yakue Leeza. Bakapilibula ba Bibilia bafuene kukoonka mu kisinka maleembo a kale saana kabili te bapalile kwalulula maleembo atunguluilue na mupasi wakue Leeza nga mubatoneene. Mpilibulo iingi ya Maleembo Atakatiifu, te iizi kubombia liina lyakue Leeza, Yehova.

Bibilia ili yamukindika muine Waatungile. (2 Samueli 23:2) Bibilia Tafsiri ya Ulimwengu Mupya ili yabombia liina lyakue Leeza mu fuasi 7 000 eevi, nga viyaali mu maleembo a kale saana a Bibilia nga viwamona foto ili pensina. (Malumbo 83:18) Eezi Bibilia ili yalangilila mawazo akue Yehova paswetele kabili ili yasomeka yaunvuikile buino, paantu bakapilibula bakitile miaka iingi batoosia buino tuntu. Kine ukuete mpilibulo ezio ya Bibilia ao abe, twakupapaata usome kila busiku Mulandu Wakue Yehova.​—Yoshua 1:8; Malumbo 1:2, 3.

• Sababu ya ki twafumiizie mpilibulo ya leenu ya Bibilia?

• Eevi muntu amane bitonene Yehova, apalile kuya waakita ki?