‘I he laui hongofulu‘i ta‘u, kuo ngāue‘aki ai, pulusi pea tufaki ‘e he Kau Fakamo‘oni ‘a Sihová ‘a e ngaahi liliu kehekehe ‘o e Tohi Tapú. Ka na‘a mau sio leva ki he fiema‘u ke fa‘u ha liliu fo‘ou ‘a ē ‘e tokoni‘i lelei ange ai ‘a e kakaí ke nau ako ‘o “‘ilo totonu ki he mo‘oní,” ‘a ia ko e finangalo ia ‘o e ‘Otuá ki he tokotaha kotoa. (1 Tīmote 2:3, 4) Ko ia ai, ‘i he 1950 na‘a mau kamata ai ke tukuange ‘a e ngaahi konga ‘o ‘emau Tohi Tapu lea fakaeonopōní, ko e Liliu Tohi Tapu Māmani Fo‘oú. Ko e Tohi Tapu ko ení kuo liliu faitōnunga mo tonu ia ki he ngaahi lea laka hake he 130.

Na‘e fiema‘u ha Tohi Tapu ‘a ia na‘e faingofua ke mahino‘i. Ko e ngaahi leá ‘oku liliu ia ‘i he faai mai ‘a e taimí, pea ko e ngaahi liliu lahi ‘oku ‘i ai ‘a e ngaahi kupu‘i lea ‘ilongata‘a pe ‘olokuonga ‘a ia ‘oku faingata‘a ke mahino‘i. Na‘e toe ma‘u foki ha ngaahi tatau tohinima motu‘a ‘a ia ‘oku tonu ange mo ofi ange ki he mu‘aki ngaahi tataú, ‘o iku ai ki hano mahino‘i lelei ange ‘a e Tohi Tapu faka-Hepeluú, faka-Alameá, mo e faka-Kalisí.

Na‘e fiema‘u ha liliu na‘e mateaki ki he folofola ‘a e ‘Otuá. ‘I he ‘ikai ke hoko ‘o tau‘atāina mei he ngaahi tohi fakamānava‘i ‘a e ‘Otuá, ko e kau liliu Tohi Tapú ‘oku totonu ke nau faitōnunga ki he mu‘aki konga tohí. Kae kehe, ‘i he ngaahi liliu lahi tahá, ko e huafa faka‘otuá, ‘a e Sihová, ‘oku ‘ikai ke ngāue‘aki ia ‘i he Folofola Mā‘oni‘oní.

Na‘e fiema‘u ha Tohi Tapu ‘okú ne ‘ave ‘a e lāngilangí ki Hono Fa‘utohí. (2 Sāmiuela 23:2) ‘I he Liliu Tohi Tapu Māmani Fo‘oú, kuo toe fakafoki ai ‘a e huafa ‘o Sihová ki he feitu‘u ‘oku hā aí ‘o tu‘o 7000 nai ‘i he ngaahi tatau tohinima motu‘a taha ‘o e Tohi Tapú hangē ko ia ‘oku fakahaa‘i ‘i he fakatātā ‘i laló. (Saame 83:18) Ko e ola ‘o e ngaahi ta‘u ‘o e fekumi tōtōiví, ‘oku fakamānako ai ‘a e Tohi Tapu ko ení ke lau, he ‘oku fakahaa‘i mahino ai ‘a e fakakaukau ‘a e ‘Otuá. Pe ‘okú ke ma‘u ‘a e Liliu Tohi Tapu Māmani Fo‘oú ‘i ho‘o leá pe ‘ikai, ‘oku mau fakalototo‘a‘i koe ke ke ma‘u ha founga-tu‘uma‘u ‘oku lelei ‘o hono lau faka‘aho ‘a e Folofola ‘a Sihová.​—Siosiua 1:8; Saame 1:2, 3.

• Ko e hā na‘a mau fakapapau‘i ai na‘e fiema‘u ha liliu fo‘ou ‘o e Tohi Tapú?

• Ko e hā ‘a e tō‘onga faka‘aho ‘oku lelei ki ha taha pē ‘okú ne loto ke ako ki he finangalo ‘o e ‘Otuá?