Kwaminyaka myiingi, Bakamboni baJehova, bakali kudinda, akumwaya mabbuku aaBbaibbele asiyene-siyene. Pesi twakabona kuyandikana kwakupanga busanduluzi bupya bwakali kuyoogwasya bantu kukwiiya ‘luzibo lwini-lwini lwakasimpe,’ kakuli aaya ngimakanze aaLeza kubantu boonse. (1 Timoteo 2:3, 4) Mpawo mu 1950 twakasanguna kugwisya zibeela zyaBbaibbele lyaNew World Translation lyamulaka wamazuba aano. Eeli Bbaibbele lyakasandululwa cakusyomeka mumilaka iinda ku130 alimwi lileendelana.

Kwakali kuyandikana Bbaibbele litakatazyi kulimvwisisisya. Mukuya kwaciindi milaka ilacinca, alimwi eezi ngazyapa kuti bumwi busanduluzi kabukatazya kubumvwisisisya. Pesi kwakajanika imalembe aciindi atakatazyi kumvwisisisya, eeci cakagwasya kumvwisisisya malembe amuBbaibbele ajanika muciHebrayo, ciAramayiki amuciGiriki.

Ibusanduluzi busyomeka kujwi lyaLeza bwakali kuyandikana. Kwiinda kuti bacite nzibayanda atala aBbaibbele, basanduluzi beelede kulemba zyeendelana amalembe aakusanguna. Aboobo mumabbuku miingi, izina lyaLeza litii Jehova, tibakalibelesya pe muMagwalo Aasalala.

Kwakali kuyandikana Bbaibbele litembawula Sikulilemba. (2 Samuele 23:2) MuNew World Translation, izina lyaJehova lyakaboozegwa oomo mulyakali kujanika mumalembe aaciindi aaBbaibbele muziindi zisika ku7 000 mbuli mbukutondeezedwe mucikozyano cilaansi. (Intembauzyo 83:18) Izyakajanika mukuyanduulisisya kwaciindi cilamfu, nzyakuti iBbaibbele eeli lilakondelezya kulibala, nkaambo libikka antangalala mizeezo yaLeza. Do nkulalyo iBbaibbele lyaNew World Translation mumulaka wako naa tukwaalyo, tukusungwaazya kuti ube abubambe bwakubala Jwi lyaJehova buzuba-abuzuba.​—Joshua 1:8; Intembauzyo 1:2, 3.

• Nkaambo nzi nikwakayandikana busanduluzi bwaBbaibbele bupya?

• Muntu woonse uuyanda kwiiya kuyanda kwaLeza weelede kucita nzi buzuba-abuzuba?