ISOMO 4
Habwaki Twaturukize Empindura ya New World Translation?
Congo (Kinshasa)
Rwanda
Ekipacu kya Symmachus ekirumu ibara lya Ruhanga erirukwera omu Zabuli 69:31 ekyazoirwe omu kyasa ekyakasatu rundi ekyakana C.E.
Kumara emyaka nyingi, Abakaiso ba Yahwe bakozesaaga empindura za Baibuli ez’enyahukana, nibaziteera kandi nibazigaba. Tukakirora nikyetaagisa kuturukya empindura erakonyera abantu kwega “n’okumanyira kimu amananu,” ekya Ruhanga agondeza buli omu. (1 Timoseo 2:3, 4) Nahabwekyo omu 1950, tukatandika kuturukya ebicweka bya Baibuli yaitu ehandiikirwe omu rulimi orukwetegerezebwa hati, erukwetwa New World Translation. Baibuli enu ehindwirwe n’obwesigwa omu ndiimi ezirukuhingura omu 130.
Baibuli eyanguhire kwetegerezebwa yali n’eyetaagisa. Endimi zikara nizihindahinduka kandi empindura za Baibuli nyingi zirumu ebigambo ebitanguhire kwetegerezebwa rundi ebirukwetegerezebwa bake muno. Baitu haroho ebihandiiko ebindi ebyaira muno haihi nibinganaingana obukuru n’ebyabandizeho ebizoirwe, ebitukonyera kwongera kwetegereza kurungi Oruheburaniya, Oruramaika, n’Oruyonani, endimi ezakozesiibwe kuhandiika Baibuli.
Empindura erukwesigwa ekaba n’eyetaagisa. Mu kiikaro ky’okuhindahindura Ekigambo kya Ruhanga ekyaterekereziibwe, abahinduzi ba Baibuli basemerire kukigumya ngu ebi bahindwire bisigaire nibisisanira kimu ebihandiiko ebyabandize. Baitu omu mpindura ezirukukira obwingi, ibara lya Ruhanga, Yahwe, tirikozesiibwe omu bicweka nambere lisemerire kuba.
Baibuli erukuhaisa ekitiniisa ogu ay’agihandiikisize ekaba n’eyetaagisibwa. (2 Samuiri 23:2) Omu bihandiiko bya Baibuli ebyabandize, ibara lya Ruhanga lisangwamu emirundi haihi 7,000 nkoku twolekerwe omu kisisani. Omu mpindura ya New World Translation, ibara linu ligarwirwe hoona nambere lisemerire kuba. (Zabuli 83:18) Baibuli enu ey’erukwoleka kurungi ebya Ruhanga arukugonza tumanye niyo erugire omu maani g’abo abakozire okuseruliza kurora ngu bagihindura. Obworaaba oine empindura ya New World Translation omu rulimi rwawe, gisome butoosa. Baitu n’obworaaba otagiine, nitukutererra kusoma Ekigambo kya Yahwe butoosa.
-
Habwaki twakirozire nikyetaagisa kugira empindura ya Baibuli empyaka?
-
Omuntu arukugonza kumanya ebirukukwata hali Ruhanga asemerire kukora ki butoosa?
