Хөй чылдар дургузунда Иегованың Херечилери Библияның янзы-бүрү очулгаларын ажыглап, парлап база тарадып келген. Ынчалза-даа кижилер алыс шынны ылап билип аарын Бурган күзеп турар болганда, ону эки билип алырынга дузалыг, чаа очулганың херегин чоорту билип каан бис (1 Тимофейге 2:3, 4). Ынчалдыр 1950 чылда «Чаа делегейниң очулгазының» бирги кезээ амгы англи дылга үнген. Бо хүн бо ылап шын болгаш билдингир очулга 130 ажыг дылдарда бар, оларның бирээзи орус дыл.

Утказы билдингир Библия херек. Үе эртерге, кандыг-даа дыл өскерлип турар болганда, билдинмес болгаш эргижирээн сөстерлиг очулгаларны чаартыры негеттинип турар. Оон аңгыда бистиң хүннеривисте оригиналга чоок бурунгу бижиктер тывылган, а олар бурунгу еврей, арамей болгаш бурунгу грек дылдарга бижиттинген библейжи сөзүглелди оон-даа эки билип алырынга дузалаан.

Бурганның сөзүн ылап шын дамчыдып турар очулга херек. Библияның очулдурукчулары туразында очулдурбайн, Бурганның хей-аът киирген оригиналда сөстеринден сырый туттунар ужурлуг. Харааданчыг чүүл, Ыдыктыг Бижилгениң очулгаларының хөй кезиинден Бурганның «Иегова» деп адын ап каапкан.

Библияның Авторун алдаржыдып турар очулга херек (2 Хааннар 23:2). Бурунгу бижиктерде 7000 хире катап таваржып турган Иегованың адын «Чаа делегейниң очулгазында» шупту черлеринде катап тургузуп каан. Бижиктерниң бир кезээн адаанда чурукта көрүп болур. Хөй чылдар дургузунда кылган хынамчалыг шинчилелдиң түңнелинде Бурганның бодалдарын тода болгаш ылап шын дамчыдып турар очулга үнүп келген. Ындыг Библияны номчууру магаданчыг. Силерниң дылыңарда «Чаа делегейниң очулгазы» бар азы чок-даа болза, силерни Иегованың Сөзүн хүннүң-не номчуурунче деткип тур бис (Иисус 1:8; Ырлар 1:2, 3).

• Чүге Херечилер Библияның чаа очулгазын үндүрерин шиитпирлээнил?

• Бурганның күзел-соруун билип алыксап турар кижилер кандыг чаңчылды сайзырадып алыр ужурлуг?