Efa misy folo taon̈o mandilatra zay, Vavolombelon̈o Jehovah nampiasa, nan̈ano pirinty, ndreky nizara Baiboly amy fandikanteny isankarazany. Hitanay koa fa ten̈a tsara izikoa misy Baiboly araiky tsotra sady mazava, ‘ahaizanolo ny marin̈y’, fotony zen̈y raha ten̈a tiany Zan̈ahary. (1 Timoty 2:3, 4) Zen̈y nahavy zahay nan̈ano Baiboly Fandikan-tenin’ny Tontolo Vaovao, tamy 1950. Mbala sasany fo nipody nadika tamy zen̈y, fa tsendriky jiaby. Baiboly io nadika tamy volan̈a 130 karazany. Tsisy hevitry nivoan̈a tao.

Tsara Baiboly izikoa tsotra ndreky mazava. Koa fa ela ny ela, volan̈anolo mahay miova, ke volan̈a amy Baiboly maro manjary sarotro ndreky tsy mazava aminolo. Misy ndraiky Soratra Masin̈y nisoratin̈y efa ela be tan̈y hita, baka amy volan̈a hebreo, aramiany ndreky griky. Izio tokony zahan̈a koa fa mandika Baiboly, fotony volan̈a aby io nanoratan̈a Baiboly voanalohany.

Izikoa fa mipody mandika Baiboly, tsy mety man̈ova dikany volan̈a ao. Olo mandika Baiboly io tsy tokony han̈ova hevitry tamy voanalohany tan̈y, fotony Volan̈a Zan̈ahary tsy tokony hivoan̈a. Raha mahagaga fo, ankamarozanolo mandika Baiboly io, man̈adoso an̈aran̈a Jehovah an̈aty ao.

Raha soratin̈y an̈aty Baiboly tokony han̈aja Zan̈ahary nan̈amia izio. (2 Samoela 23:2) Io misy sariny Baiboly Fandikan-tenin’ny Tontolo Vaovao. Misy an̈aran̈a Jehovah im-7 000 mipody ao, mira izy nisoratin̈y tamy voanalohany tan̈y fo. (Salamo 83:18) Iro olo mandika izio koa mbala mitady raha hampazava tsarabe Volan̈a Zan̈ahary amy Baiboly ao. Anao na misy Baiboly Fandikan-tenin’ny Tontolo Vaovao na tsisy, tsara izikoa anao zatra mamaky Baiboly isanandra.—Josoa 1:8; Salamo 1:2, 3.

• Ino ma raha nahavy zahay tapakevitry nipody nandika Baiboly?

• Izikoa olo araiky man̈iry hahay sitrapony Zan̈ahary, ino raha mila ataony?