Mimvu miwombo mivioka, Zimbangi zi Yehova babesadilanga, bimisa mu masini, ayi kabula zimbangudulu zi Bibila zi phila mu phila. Vayi tuyiza mona ti tufueti bimisa mbangudulu yimosi yi Bibila yoyi yela sadisa batu babaka “nzayilu yifuana yi kiedika,” mu phila Nzambi katididi mu diambu di mutu woso. (1 Timoteo 2:3, 4) Diawu, mu mvu 1950 tutona bimisa bitini bi Bibila Mbangudulu yi nza yimona mu Kingeloso. Bibila beni kimebangulu mu kuikama ayi mu bufuana mu zimbembo viokila 120.

Yilombama bimisa Bibila mu thubulu yoyi yi kondolo phasi mu sudika. Zimbembo ziozi batu beta tuba zieta kuiza suasakana ku manima, ayi zimbangudulu ziwombo zi Bibila zieta sadila thubulu yi thama, voti yo kayibimisanga ko mbotembote diyindu. Botula diawu, zimaniskri zithama zi Bibila zio zilutidi fuana ayi minkanda mi thonono miyiza monika. Miawu misadisa mu zaba mbote Ebeleo, Alamaye, ayi Greki, zimbembo zio basonikina Bibila va thonono.

Yilombama mbangundulu mosi yo yidi nguizani ayi Phova Nzambi. Va buangu ki buela voti botula mambu mankaka mu Phova Nzambi, mimbangudi mi Bibila bafueti bimisa kaka mu kuikama koso mayindu ma Masonoko ma thonono. Vayi, mu zimbangudulu ziwombo zi Masonoko Masantu, dizina di Nzambi, Yehova, muisi ko.

Yilombama bimisa Bibila kimosi kio kimvana Mfumu andi lukumu. (2 Samueli 23:2) Bibila Mbangudulu yi nza yi mona kivutudi dizina Yehova mu zikhumbu viokila 7000 mu bibuangu biobi yiba mu zimaniskri zithama zi Bibila, mu phila yoyi mbonosono yayi yidi vatsi yimonisa yawu. (Nkunga 83:18) Mimbangudi mi Bibila Mbangudulu yi nza yi mona batombatomba mu phinda mimvu miwombo mu diambu di bimisa mbangudulu yo yinyangidika mu tanga ayi yo yimbimisanga mbotembote mayindu ma Nzambi. Yiba ti widi ayi Bibila Mbangulu yi nza yimona voti nana, tukukindisa wutanganga Phova yi Yehova lumbu ka lumbu.—Yosua 1:8; Nkunga 1:2, 3.

• Bila mbi tumuena ti tufueti bimisa mbandulu mosi yimona yi Bibila e?

• Mbi mutu nioni widi phuila yi longuka luzolo lu Nzambi kafueti vanga lumbu ka lumbu e?