Walasa ka taa an ka lajɛw la tuma bɛɛ, an labɛnnen don ka tuw kɔnɔna cɛci walima ka taa lajɛw la waati cogoya bɛɛ kɔnɔ. Diɲɛ gɛlɛyaw ani sɛgɛn min bɛ kɛ an na ni an jigina ka bɔ baara yɔrɔ la, o tɛ an bali ka an dalajɛ ni Jehova Seere wɛrɛw ye. Mun na Jehova Seerew bɛ nin cɛsiri sugu kɛ?

An ka ɲɛnamaya bɛ ɲa. Ciden Paul y’a ɲini jɛkuluw kɔnɔ mɔgɔw fɛ u ka u “janto ɲɔgɔn na”, o min kɔrɔ ye ko an k’a ɲini ka ɲɔgɔn dɔn. (Heburuw 10:24) O kuma fɛ, a bɛ an jija k’an janto ɲɔgɔn na kosɛbɛ. An kɛtɔ k’a ɲini ka jɛkulu kɔnɔ mɔgɔ wɛrɛw dɔn, an bɛn’a ye k’o mɔgɔ dɔw ye se sɔrɔ, gɛlɛyaw kan minnu bɛ an kan. O la, olu bɛ se ka an dɛmɛ ka se sɔrɔ an taw kan.

An bɛ teri sɛbɛw sɔrɔ. An ka lajɛw waatiw la, an tɛ kɛ ni an dɔnbaga gansanw ye, nka an bɛ kɛ ni teriw de ye. Waati wɛrɛw kɔnɔ, an bɛ ɲɛnajɛ bɛnnenw kɛ ɲɔgɔn fɛ. O jɛɲɔgɔnya sugu bɛ mun lase an ma? O bɛ a to an ko bɛ diya ɲɔgɔn ye ka taa a fɛ, o min bɛ a to kanuya min bɛ an ni ɲɔgɔn cɛ balimaya ta fan fɛ o bɛ kɔgɔ. O la ni gɛlɛya ye an dɔ la kelen sɔrɔ, an b’a bɔ an yɛrɛ la, k’o tigi dɛmɛ bawo teriya sɛbɛ donna an ni ɲɔgɔn cɛ. (Ntalenw 17:17) Ka taa bɔ an ka jɛkulu kɔnɔ mɔgɔw bɛɛ ye, o bɛ a jira ko an bɛ an “janto ɲɔgɔn na cogo kelen na.”—1 Kɔrɛntekaw 12:25, 26.

An bɛ dusu don i kɔnɔ i ka teriw sugandi minnu bɛ Ala sago kɛ. I bɛna o teri suguw sɔrɔ Jehova Seerew cɛ la. Foyi kana i bali ka i fara an ka.

• Mun na nafa b’a la an ka ɲɔgɔn sɔrɔ an ka lajɛw waatiw la?

• I b’a fɛ k’an ka jɛkulu dɔn tuma jumɛn?