Mbua, to̱ lo̱ndo̱ la bwaba ba si meka biso̱ ná jukeye o ndongame̱n asu. Mboṅ a Yehova i be̱n ndut’a longe̱, i mawo̱lo̱ pe̱ ka bato be̱se̱ ponda i mawano̱ o ebolo. Nde ońola nje ba mapo̱ngo̱no̱ miwe̱n jita o jukea o ndongame̱n na bane̱ bonasango abu e?

Mwe bwam ońola ja lasu la bwam. Ponda a tano̱ a kwalea ońola ba ba mako̱to̱me̱ o mwemba, ńamuloloma Paulo a kwali ná “jombwane̱ mō̱ na nune̱.” (Bonahebe̱r 10:24) Na be byala, a puli nde o kwalisane̱ biso̱ ná “di no̱nge ponda o biane̱le̱.” Na di take mwemba na bonasango asu. Di sisedi te̱ mbia te̱ ma bonasango asu be̱be̱, di me̱nde̱ so̱ ná ba mapo̱ngo̱ miwe̱n o buka jita la ndutu ye bowan ka yasu. Be ná bongwane̱ biso̱ o tongwe̱le̱.

Mu mongwane̱ o longa mako̱m ma bo̱ibo̱i. O ndongame̱n asu di titi buka te̱ beko̱lo̱ngo̱ne̱, je pe̱ nde mako̱m ma batabata. Di madongame̱ne̱ pe̱ dongo la ponda o longe̱le̱ ńolo. Njika tombwane̱ mu mulatako mu mawaneano̱ biso̱ e? Di mokwa biane̱le̱ mō̱ na nune̱. Ndol’asu pe̱ e mabata jembame̱. Nika e mabola ná, ponda bonasango asu ba makusano̱ ndutu, je be̱be̱ o jongwane̱ babo̱, ka mako̱m ma mbale̱. (Minia 17:17) Tongwea na mu mulatako masu di malee̱le̱ ná je nde belongi be mongwane̱le̱ mō̱ na nune̱.​—1 Korinto 12:25, 26.

Di mome̱le̱ wa ná o po̱se mako̱m mo̱ngo̱ oteten a ba ba mabole̱ jemea la Loba, ka Mboṅ a Yehova. Son, bola me̱se̱ o lata na biso̱.

• Ońola nje nika ńeno̱ biso̱ tombwane̱ ná di ko̱to̱me̱ o ndongame̱n e?

• O me̱nde̱ so̱ to̱ndo̱ o jukea o ndongame̱n asu, na lata na biso̱ e?