Sɛ bi a ɔwɔ dɛ yetwa kwan fa kwaa kusuww anaa wimu tsebea a ɔnnyɛ mpo mu a, yɛnntoto hɛn Christianfo nhyiamukɔ ase. Ɔmmfa ho dɛ Jehovah Adasefo hyia nsɛndzendzen wɔ hɔn asetsena mu, na wɔbɔpon edwuma so nna wɔaberɛ no, ebɛnadze ntsi na wɔbɔ mbɔdzen dɛ wɔnye hɔn mfɛfo agyedzifo behyia mu?

Oye ma hɛn yieyɛ. Aber a Paul rekã hɔn a yɛnye hɔn bɔ fɛkuw wɔ asafo no mu no ho asɛm no, ɔkyerɛɛw dɛ “yɛndwendwen hɛnho do.” (Hebrewfo 10:24) Dza dɛm asɛm yi kyerɛ nye dɛ, ɔwɔ dɛ yehu hɛnho yie. Ntsi ɔsomafo no ne nsɛm no hyɛ hɛn nkuran dɛ yɛndwen afofor ho. Sɛ yehu Christianfo mbusua afofor yie a, yebohu dɛ hɔn mu binom egyina nsɛndzendzen a yerihyia no bi ano pɛn, na wobotum aboa hɛn ma yeegyina hɛndze no ano yie.

Ɔma yenya anyɛnkofa a no mu yɛ dzen. Wɔ hɛn nhyiamu ahorow ase no, yemmbu hɔn a yɛnye hɔn dzi ehyia no dɛ wɔyɛ amanyifo biara kɛkɛ, na mbom yebu hɔn dɛ wɔyɛ hɛn anyɛnkofo a wɔbɛn hɛn ankasa. Odu mber bi so a, yɛbɔ mu hyia gye hɛn enyi wɔ ɔkwan a ɔfata do. Ebɛn mfaso na dɛm fɛkuwbɔ yi ma yenya? Ɔma yesũa dɛ yebenya enyisɔ kɛse ama hɛnho, na iyi hyɛ ɔdɔ a ɔwɔ hɛn mu no dzen. Ntsi sɛ hɛn nuanom no rihyia ɔhaw bi a, yɛyɛ ntsɛm boa hɔn osiandɛ yɛnye hɔn enya anyɛnkofa a no mu yɛ dzen. (Mbɛbusɛm 17:17) Sɛ yɛnye hɛn asafo no mufo nyinara bɔ fɛkuw a, yɛkyerɛ dɛ ‘yeenya ndwendo kor no ara ama hɛnho nkorkor.’​—1 Corinthfo 12:25, 26.

Yɛhyɛ wo nkuran dɛ paw hɔn a wɔreyɛ Nyankopɔn n’apɛdze no dɛ w’anyɛnkofo. Ibenya dɛm anyɛnkofo yi wɔ Jehovah Adasefo mu. Yɛserɛ dɛ mma biribiara nnsiw wo kwan dɛ enye hɛn bɔbɔ fɛkuw.

• Ebɛnadze ntsi na mfaso wɔ do dɛ yɛnye hɛn nuanom bɔbɔ fɛkuw wɔ nhyiamu ahorow ase?

• Aber bɛn na w’enyi bɛgye ho dɛ ebɛba hɛn nhyiamu na eebohu hɛn asafo no mufo no yie?