Ti katoatai n iririi ara bobotaki ni Kristian e ngae ngkana ti na ribuakon te buakonikai ae ibetutu kaina ke te angibuaka. E aera ngkai a kakorakoraia Ana Tia Kakoaua Iehova n iraorao ma raoia n onimaki, n aki ongei kangaanga ni maiuia ao kuaia imwin aia mwakuri?

Ti buokaki iai n tokanikai i aoni kangaanga. E korea ae kangai Bauro ni kaineti ma te koraki ake ti iraorao ma ngaiia n te ekaretia: “Ti na iaiangoira i marenara.” (I-Ebera 10:24) Nanon taeka akanne, bwa ti na “karaua n iaiangoia” ae ti kaungaaki iai bwa ti na kinaira raoi. Ai ngaia are ti kaungaaki n ana taeka te abotoro bwa ti na tabeakinia aomata nako. Ngkana ti a kinaia raoi utu ni Kristian ake tabeua riki, ti a noria iai ae a a tia tabeman mai buakoia n tokanikai i aoni kangaanga aika ti aitara naba ma ngaai ao a kona ni buokira n tokanikai i aoia.

E kateimatoaaki iai ara iraorao. Ti bobotaki ma raora tabeman ake ti kaan riki ma ngaiia n ara bobotaki. Ma ti karekei ara tai ni bobotaki ni kaakibotu aika kaungaunga n taai riki tabeua. Tera te kakabwaia man te aeka n iraorao anne? Ti a ataa iai kakawakia aomata ao e a kakorakoraaki iai reitakira n te tangira. Ao ngkana a aitara raoraora ma kangaanga, ti a waetata ni buokiia ibukina bwa ti a kamani bwaina te iraorao ae nene. (Taeka N Rabakau 17:17) Ti kaotira bwa ti ‘tabeakinira i marenara,’ ngkana ti bobotaki ma kaain ara ekaretia ni kabane.—1 I-Korinto 12:25, 26.

Ti kaungako bwa ko na rineia raoraom ake a kakaraoa nanon te Atua. Ko kona ni karekeia raoraom ake a kakaraoa naba anne i buakoia Ana Tia Kakoaua Iehova. Tai kariaia te bwai teuana bwa e na katoka am iraorao ma ngaira.

• E aera ngkai ti na kakabwaiaaki n ara iraorao n taiani bobotaki?

• N ningai ae ko na kinaia raoi iai kaain ara ekaretia?