Ə ma kɛ maanɛɛ ku hiɛ kweaa ɓo, ku tɛɛ palaya hu, tulɔ ə ku kɛlɛ, kwa yili kəlee kɛ, ə gɛ kwə li ku wɔ ŋaakpɔnŋaa diɛ kɛlɛ-kɛlɛ. Ə ma kɛ mɛni kaa kuɔ, ku ma tuwɔ kóló kɛi, yili hwa ku hwiikpɛɛ hiɛ gee pulu laa kɛ mɛni ɓa kwa Zehova ŋɔ Kəla takpɛliɠaa. Kwa yili kəlee kɛ lə mɛni ɓa ?

Yili a ku holoonaɓo. Apɔtɛlɛ Pɔli ə mo kalan nea diɛ, yɛ diɛ di di ““ kee ni mɛi kaa. ” (Hebulu 10:24). Yili mukulaa ɓaa, maanɛɛ diɛ di kee ni maa kiliŋahiɛ kɛ. Pɔli a nwoo tii ɓo, gaa gu hwaŋalɔi, ə gɛ gu gu maakwɛli gu kee ni kɔlɔnŋaa ɓa. Gwa kɛi gu maakwɛli galangbɔn ɉu nua takpɛliɠaa kɔlɔnŋaa ɓa, gwa ɲaakaa guɔ diɛ kpɛli daa tɛɛ mɔnɔ tamaa hu di wɔ kalan ɲii ɓoɔ hu. Yili ɓa, da pɛli kpɔnmaa tɛɛi gu pɔ gu tɔɔ kpaan gu wɔ mɔnɔɠaa hu.

Kwa ɓəlan naa hɔlɔɓo yii daɠa laa walaa. Kwa kɛ ku wɔ ŋaakpɔnŋaa diɛ, ku hwa kɛ lɔ yɛ ɲɛi kɔlɔnŋaa da di kee kaa, kwa kɛ a ɓəlan neeleeɠaa. A kɛ nwɔnɔ a lowai taɠaa, kuɔ ku ŋaakpɔn, kuɔ pə́lə́ kɛ gee pɔ a nɛlɛɛ. Lə ɓə yili a dɛɛ ku pɔ ? Ku kee ni túwɔ́ pələ a kɛ ku kwəi nɛɛi, yili a ku wɔ wɛlikɛmaa huwala-wala. Yili ɓa, ku ɓəlan mun da a mɛni hɔlɔɓo, kwa kpɔnmaa tɛɛ bɔ, maahɔlɔɓo ɓəlan naa leelee kaa ku lowai (Haŋɔn 17:17, TMN). Kwa kɛi hiɛ gee pulu laa kɛ kwa ku ɓəlaa kalan nea, kwa nɛ kuɔ ku “ yiliɛ [ku] kee ɓa ”. — Kɔlɛntə dɔlɔɔ 12:25, 26.

Ya kɛ ə́ ɓəlan naa kɛ, gɛ a Yálá liiɓa kɛ nua di wɔ ɓəlan naa. Ya pɛli məlan naa tii hɔlɔɓoi Zehova ŋɔ Kəlaɠaa lowai. Kɛlɛɛ ho mɛni lɔpee ta lɛɛ laa ho kpean ə́ tɔwɔ, ə́ lɛɠɛ mɛni ɓa kuɔ.

• Ku li mɛni ku wɔ ŋaakpɔnŋaa diɛ dɔlɔ ɓaa lə ?

• Lə yələ ɓə ə́ kaa pai lii la ku wɔ ŋaakpɔn ma ?