Tseepá kemetewa ʼɨɨtsitá teʼuhutɨ, nutsɨ kwinié mɨtiuwiwiye metá mɨtiuxɨká, Jehová Niukíeya temɨkuxaata tepetaʼaxe taxeɨritsika. ¿Títakɨ yeme teteʼuyukuxexeɨriwa taʼiwama wahaamatɨa tseepá haxa temɨteʼanuyehú tatuukaaritsíe nutsɨ tseepá temeuʼuʼuxe taʼuximayatsikakɨ?

Pɨtatsikupareewiwa ʼaixɨ temɨteheukutenikɨ. Temɨkatekuhayeikawanikɨ teʼuyukuxexeɨriwatɨ, nɨʼariwame Pablo putayɨ́: «tepɨtewautɨweni kehepaɨ temɨteyupareewieni temɨyunaakeʼeriekakɨ» (Hebreos 10:24). Temɨyupareewieka panɨyɨne «xeime yɨɨkɨ tiʼaneeme pemɨranuyexeiya ʼamaitɨ». Nɨʼariwame Pablo pɨtarahɨawe matsi waɨkawa tepeyutimamateni, hiipame waheetsíe tepeuyuʼiyaritɨaka. Kepauka taʼiwama wahaamatɨa temɨteʼutixaxaatatsíe, tepɨtehetimamaateke mɨkɨ tsiere mepɨteʼanutaxeiyaxɨa titatsíe tame temɨteʼuyehú, mɨkɨ pɨtatsikupareewiwa temɨteʼanutaxeiyaxɨanikɨ.

Hamikuma heyeme tewarexeiyatɨ tepakɨká. Keane tahaamatɨa memuyukuxexeɨriwa xeikɨ́a teukawamate, matsi pɨɨtá tahamikuma mepɨhɨɨkɨ. Tsiere, heiwa tepuyukuxexeɨriwa taʼiwama wahaamatɨa yɨɨkɨ temɨteyurienikɨ. ¿Ketatikupareewiwa taʼiwama wahaamatɨa ʼaana temuyukuxexeɨriwatsíe? Pɨtikuyuruwa ʼaixɨ temɨteyuxeiyani metá matsi waɨká temɨyunakeʼerieka. Metá kepauka taʼiwama haxa memɨteʼanuyehunitsíe, yepauka tepɨwakupareewiwa tahamikuma yuri memɨhɨɨkɨkɨ (Proverbios 17:17). Meyunaime taʼiwama wahaamatɨa temuyukuxexeɨriwatsíe, tepɨtehekɨatá kenaame teheuyuʼiyaaritɨa «teyunaitɨ takɨmaana» (1 Corintios 12:25, 26).

Tematsiʼinié hamikuma pemɨwaranayawawanikɨ keane memɨteʼayaʼatɨwa Yuútsi mɨreuyehɨwá hepaɨ. Hamikuma mɨpaɨ meteʼuʼiyaarime pepɨwakaxeiya Jehová Niukíeya memɨkuxaata watsata. Tixaɨtɨ kametiukuhanani tahaamatɨa pemuyukuxexeɨriwanikɨ.

• ¿Títakɨ ʼaixɨ tiʼane taʼiwama wahaamatɨa temuyukuxexeɨriwani?

• ¿Kepauka metsikunanake taxeɨritsika pemumié?