Nandarire kutja tu sokupitira mokati kovihwa poo nandarire kutja maku roko poo ku nombepera, eṱe aruhe tu kara pozombongarero zetu zombongo. Nandarire kehi yomauzeu wehupo nokuurwa kombunda yoviungura, omena ratjike Ovahongonone vaJehova tji ve tjita ozongondjero nḓe ṱa mbo kokutja ve kare pu novakambure ovakwao?

Ku tu etera ouwa. Paulus tja tjanga kutja “Ngatu rikenderasane,” eye aa hungirire ku imba mbu tu kara pamwe mombongo. (Ovaheberi 10:24) Omambo ngo maye hee kutja “tu sokuripurira oukoto” kovakwetu, nokuvetjiwa nawa. Okutja omambo womuapostle Paulus nga, maye tu tunduuza kutja tu rikendere kovakwetu. Indu tji twa tjiwa ouṋepo warwe mombongo, eṱe matu munu kutja tjiva wawo wa toṋa mozongondjero ozengi tjimuna inḓa ozetu oveni nu ihi matji tu vatere kutja eṱe wina tu toṋe momauzeu wetu.

Ku tunga oupanga oukarerere. Ovakriste mbu tu worongana pamwe, kavandu mbu tu i uriri, nungwari owo omapanga wetu wopopezu. Motuveze twarwe eṱe tu kara pamwe amatu nyanda omanyando omatunge. Okukara pamwe ku eta ouwa waye? Ku tu honga okuvarasana pondondo yokombanda, nu ku kurisa orusuvero rwetu novakwetu. Indu omapanga wetu tji ye ri mouzeu, tu ye vatera tjimanga orondu twa zikamisa oupanga oupame na wo. (Omiano 17:17) Okukara puna ouṋepo auhe wombongo ku raisa kutja eṱe tu “rikenderasana.”​—1 Ovakorinte 12:25, 26.

Matu ku tunduuza kutja u toorore omapanga woye mokati kaimba mbe tjita ombango yaMukuru. Omapanga otja ingo mo yenene okuyemuna mokati kOvahongonone vaJehova. Ngoo roro okuyandjera ngamwa otjiṋa okukuyarura ombunda.

• Omena ratjike tje ri otjiṋa otjiwa ku eṱe okukara pamwe?

• Ove otjo vanga okuyekutuvarura ruṋe pozombongarero zetu, u tu tjiwe nawa?