Taja pan kami bejalai nengah kampung puang tauka ngelaban hari ti kudi, kami tetap datai gempuru Kristian. Taja pan bisi penanggul ba pengidup enggau lelak pengudah bekereja, nama kebuah Saksi-Saksi Jehovah enggau naka ulih begulai enggau bala sama pengarap?

Tu meransang kami. Paul meransang bala sama pengarap “berundingka” pangan diri. (Hebrew 10:24) Reti jaku tu ngambika “berunding enggau dalam,” iya nya, kena ngelala pangan diri. Nya alai, jaku rasul ditu meransang kami berundingka orang bukai. Ketegal ngelala ruang bilik Kristian ke bukai, kami nemu sida udah mujur mutarka penanggul ti sama enggau kami, lalu tu ngasuh sida ulih nulung kami.

Tu ngerapatka kaul. Ba gempuru, kami begulai rapat enggau pangan diri. Pia mega, kami bisi maya merindang ati. Nama penguntung ke diulih ari begulai baka nya? Kami ulih meda pemanah pangan diri, lalu tu ngeringka pengerindu kami. Lalu, lebuh maya bala menyadi Kristian kami bisi penusah, kami besedia deka nulung sida laban kami udah bisi kaul ti rapat. (Jaku Dalam 17:17) Ari begulai enggau semua raban dalam eklisia, kami ngayanka kami “ibuhka pangan diri.” —1 Korint 12:25, 26.

Kami meransang nuan milih orang ke ngereja utai ti dikedeka Petara nyadika pangan. Nuan deka tetemuka bala pangan ke baka nya ba entara Saksi-Saksi Jehovah. Anang ngasuh sebarang utai nagang nuan ari begulai enggau kami.

• Nama penguntung enti begulai enggau pangan diri ba gempuru?

• Kemaya nuan deka bekelala enggau bala Saksi ba eklisia kami?