Nam mali ni hpe lai di ra ai raitim, du hkra ladaw n kaja ai raitim, anhte gaw zuphpawng ni hpe ayan sa ai. Prat a mayak mahkak ni, shani tup bungli galaw ai majaw hki ba ai aten ni hta pyi, Yehowa Sakse Ni gaw shada da kanawn mazum na matu hpa majaw dai daram shakut ma a ta?

Dai gaw prat a mayak mahkak ni hpe hparan ai hta karum ya ai. Pawlu gaw hpung hta kanawn mazum ai lam tsun ai shaloi “langai hte langai myit tau myit htang nga ga” nga nna tsun ai. (Hebre 10:24) Dai gaw langai hte langai grau hku hkau wa hkra galaw ra ai hpe tsun ai re. Dai majaw, Pawlu a ga ni gaw kaga masha ni a lam hpe, myit shang sha na matu anhte hpe n-gun jaw nga ai re. Kaga masha ni hte grau hku hkau wa ai shaloi, shanhte hta na nkau mi gaw anhte hkrum nga ai mayak mahkak hpe awng dang wa ai lam chye wa ai. Anhte mung dai hpe awng dang hkra shanhte kaw na hpaji lu la ai.

Hku hkau ai jinghku ni lu hkra karum ya ai. Zuphpawng ni hta hkrum zup ai hpunau, nauna ni gaw grai hku hkau ai jinghku ni re. Kalang lang ban sa ai lam hta arau shang lawm ma ai. Dai hku kanawn mazum ai gaw hpa akyu jaw a ta? Langai hte langai grau manu shadan chye wa nna, tsaw myit sumri mung grau ngang kang wa ai. Dai zawn hku hkau ai jinghku ni byin wa ai majaw, anhte a hpunau, nauna ni mayak mahkak hkrum wa ai shaloi, karum ya na matu jin jin rai nga ai. (Ga Shagawp 17:17) Hpung hta nga ai hpunau ni yawng hte, kanawn mazum nna “shada da myit tsang hkat” ai lam madun ma ai.​—⁠1 Korinhtu 12:24, 26.

Karai Kasang myit ra ai lam hpe galaw nga ai ni hte jinghku hku na matu nang hpe n-gun jaw mayu ai. Dai zawn re ai jinghku hpe Yehowa Sakse Ni a lapran hta mu lu ai. Anhte hte kanawn mazum na matu chyeju hte hkum htingnut u.

• Zuphpawng ni hta arau kanawn mazum ai gaw anhte hpe hpa akyu jaw a ta?

• Anhte a zuphpawng de nang galoi sa lung na kun?