Wat la ngi hap ban ïaid lyngba ki khlaw ba rben ne haba ka jinglong ka suiñ bneng ka sniew katno katno ruh, ngim ju pep ban leit jingïalang. Wat hapdeng ki jingeh bad ka jingthait hadien ba la wan trei, balei ki Nongsakhi U Jehobah ki pyrshang katba lah ban leit sha ki jingïalang?

Ka dei na ka bynta ka jingbha jong ngi. U Paul u la thoh “iapyrkhat” iwei ïa iwei, hangne u kdew ïa kito kiba ngi ju ïakynduhlang ha ki jingïalang. (Hebru 10:24) Ka jingmut jong kane ka jingong ka dei, “ban pyrkhat iwei ïa iwei;” kaba mut, ban tip bad ban sngewthuh iwei ïa iwei. Te ki ktien jong u Paul ki pynshlur ïa ngi ban pyrkhat lem ïa kiwei. Da kaba tip ïa kiwei de ki longïing Khristan, ngi shem ba don napdeng jong ki kiba la jop ïa ki jingeh kiba ngi ruh ngi mad, bad ki lah ruh ban ïarap ïa ngi kumno ban jop ïa ki.

Ka tei ïa ka jingïalong paralok kaba khlaiñ. Ha ki jingïalang jong ngi, ngi ïalumlang, ym bad ki briew kiba ngi shu ithuh hynrei bad ki paralok ba ïajan. Don ruh ki por kiba ngi ju pynlut ha ka ban ïa lehkmen lehsngewbha lang. Kum kine ki jingïakynduhlang ki ai jingmyntoi aïu? Ngi nang ban ñiewkor iwei ïa iwei bad kata ka pynskhem ïa ka jingïaieid jong ngi. Te, haba ki para bangeit jong ngi ki mad ïa ki jingeh, ngi kloi ban ïarap ïa ki namar ngi don ka jingïadei paralok kaba skhem. (Proberb 17:17) Da kaba ïasylloklang bad baroh ki dkhot jong ka balang ngi pyni ba ngi ïa kit khia markylliang.​—1 Korinth 12:25, 26.

Ngi pynshlur ïa phi ban jied ïa kito kiba leh ïa ka mon jong U Blei kum ki paralok jong phi. Phin shem ïa kum kita ki paralok hapdeng ki Nongsakhi U Jehobah. Sngewbha wat ai ba kaei kaei ruh kan khang lad ïa phi ban don ryngkat bad ngi.

• Balei ka ai jingmyntoi ïa ngi ban ïadonlang ha ki jingïalang?

• Lano phi kwah ban ithuh bha ïa ki dkhot ka balang jong ngi?