တၢ်မၤလိ ၆
တၢ်ရ့လိာ်သးဒီး ခရံာ်ဖိကဒဲကဒဲန့ၣ် အဘျုးအိၣ်လၢပဂီၢ်ဒ်လဲၣ်
ပမ့ၢ်ဘၣ်လဲၤခီဂာ် ပှၢ်မုၢ်ကနၢမ့ၢ်ဂ့ၤ, မူခိၣ်ကလံၤသီၣ်ဂီၤ မ့ၢ်တဘၣ်လိာ်ဘၣ်စးမ့ၢ်ဂ့ၤ, ပဝဲသ့ၣ်တဖၣ် ပလဲၤထီၣ်ခရံာ်ဖိတၢ်အိၣ်ဖှိၣ်ရိဖှိၣ် ဘၣ်ဆၢဘၣ်ကတီၢ်လီၤ. ယဟိဝၤပှၤအုၣ်အသးတဖၣ်န့ၣ် ကွၢ်ဆၢၣ်မဲာ်ဘၣ် တၢ်အိၣ်မူတၢ်ကီတၢ်ခဲဒီး ကလီၤဘှံးလီၤတီၤဝဲလၢ တနံၤမုၢ်အတၢ်မၤဝံၤ အလီၢ်ခံသနာ်က့ ဘၣ်မနုၤအဃိအဝဲသ့ၣ် ဂုာ်ကျဲးစၢးရ့လိာ်အသးဒီး ပှၤလၢအတၢ်စူၢ်တၢ်နာ် ဒ်သိးဒီးအဝဲသ့ၣ်န့ၣ်လဲၣ်.
တၢ်အံၤမၤစၢၤပှၤလၢ ပကမၤနၢၤ တၢ်အိၣ်မူအတၢ်ကီတၢ်ခဲ. ဖဲစီၤပီလူးကွဲးဝဲလၢ “မ်ပကွၢ်လိာ်ပသး တဂၤဒီးတဂၤ” အခါ, အဲၣ်ဒိးစံးဝဲဘၣ်ဃးဒီးပှၤလၢ ပရ့အီၤတဖၣ်လၢ တၢ်အိၣ်ဖှိၣ်ပူၤန့ၣ်လီၤ. (ဧ့ၤဘြံၤ ၁၀:၂၄) တၢ်ကတိၤအံၤန့ၣ် အခီပညီအိၣ်စ့ၢ်ကီးလၢ ပကဘၣ်သ့ၣ်ညါလိာ်ပသး တဂၤဒီးတဂၤဂ့ၤဂ့ၤလီၤ. လၢတၢ်န့ၣ်အဃိ စီၤပီလူးအတၢ်ကတိၤတဖၣ်အံၤ ဟ့ၣ်ဂံၢ်ဟ့ၣ်ဘါပှၤလၢ ပကဘၣ်သးအိၣ် ပှၤအဂၤလီၤ. ခီဖျိလၢပသ့ၣ်ညါ ခရံာ်ဖိဟံၣ်ဖိဃီဖိအဂၤတဖၣ် ဂ့ၤဂ့ၤဘၣ်ဘၣ်အဃိ, ပထံၣ်ဘၣ်လၢ အဝဲသ့ၣ်အကျါတနီၤ မၤနၢၤကွံာ်ဝဲ တၢ်ကီတၢ်ခဲလၢအဒ်သိးဒီးပှၤ ဒီးအဝဲသ့ၣ်မၤစၢၤပှၤသ့လၢ ပကမၤနၢၤတၢ်စ့ၢ်ကီးလီၤ.
တၢ်အံၤဒုးအိၣ်ထီၣ် ပတၢ်ရ့လိာ်သးလၢ အဂၢၢ်ကျၢၤ. ပထံၣ်လိာ်ဘၣ်ပသးဒီး ပတံၤသကိးလၢ ပရ့ဒီးအီၤဘူးဘူးတံၢ်တံၢ်တဖၣ် ဖဲပထီၣ်တၢ်အိၣ်ဖှိၣ်ရိဖှိၣ် အဆၢကတီၢ်န့ၣ်လီၤ. တဘျီတခီၣ်န့ၣ် ပသူတၢ်ဆၢကတီၢ်ဒ်သိးသိးလၢ တၢ်မၤမုာ်မၤဖှံသးလၢအဂ့ၤအဂီၢ်လီၤ. ခီဖျိလၢပရ့လိာ်သးဒ်အံၤအဃိ ပဒိးန့ၢ်ဘၣ်တၢ်အဘျုးမနုၤလဲၣ်. မ့ၢ်လၢပသ့ၣ်ညါအါထီၣ်ဘၣ် တဂၤဒီးတဂၤ အတၢ်ဂ့ၤတၢ်ဝါအဃိ မၤဂၢၢ်ကျၢၤထီၣ်ဝဲ ပတၢ်အဲၣ်လိာ်သးတဂၤဒီးတဂၤလီၤ. မ့ၢ်လၢပအိၣ်ဒီး တၢ်ရ့လိာ်သးဂၢၢ်ဂၢၢ်ကျၢၤကျၢၤအဃိ လၢခံန့ၣ် ဖဲပဒီပုၢ်ဝဲၢ်မုၣ် ဒီးဒီပုၢ်ဝဲၢ်ခွါတဖၣ် ကွၢ်ဆၢၣ်မဲာ်ဘၣ်တၢ်ကီတၢ်ခဲအခါ ပမၤစၢၤအဝဲသ့ၣ်လၢအချ့န့ၣ်လီၤ. (ကတိၤဒိ ၁၇:၁၇) မ့ၢ်လၢပရ့လိာ်သးဒီး ပတၢ်အိၣ်ဖှိၣ်ဖိခဲလၢာ်အဃိ ပပာ်ဖျါထီၣ်လၢ ပအိၣ်ဒီးတၢ် “အံးက့ၤကွၢ်က့ၤလိာ်အသး ထဲသိးထဲသိးန့ၣ်လီၤ.”—၁ ကရံၣ်သူး ၁၂:၂၅, ၂၆.
ပဟ့ၣ်ဂံၢ်ဟ့ၣ်ဘါနၤလၢ နကဃုထၢနတံၤသကိးလၢအမ့ၢ် ပှၤလၢအမၤယွၤအတၢ်ဘၣ်သးတဖၣ်န့ၣ်လီၤ. တံၤသကိးတဖၣ်အံၤန့ၣ် နကထံၣ်ဘၣ်အီၤလၢ ယဟိဝၤပှၤအုၣ်အသးတဖၣ်အကျါလီၤ. ဝံသးစူၤတဘၣ်ဟ့ၣ်အခွဲးလၢ တၢ်ကမၤတံာ်တာ်နၤလၢ နကရ့လိာ်သးဒီးပှၤ နီတမံၤတဂ့ၤ.
-
တၢ်ရ့လိာ်သး လၢတၢ်အိၣ်ဖှိၣ်ရိဖှိၣ်န့ၣ် ကဲဘျုးကဲဖှိၣ်လၢပဂီၢ်ဒ်လဲၣ်.
-
နကဟဲထီၣ် ပတၢ်အိၣ်ဖှိၣ်ရိဖှိၣ် ဆံးယံာ်လဲၣ်.