Bʼꞹbʼꞹ nu in dyokjojme kʼꞹ nzhontrji na punkjꞹ pa ra zⱥtrji nu ja jmurꞹji. Zo na paʼa jyarꞹ, zo ri ñe̱trjo dyebʼe, zo kjogꞹji kja trʼeje pa ra zⱥtrji, zo pɇpjiji texe yo paa ndeze ma xo̱rtjo asta ma nrrempa, poji nu ja jmurꞹji. ¿Pjenga dya bʼɇzhiji ga jmurꞹji yo testigo e Jehová ko o kjuarmaji?

Ma ri jmurgojme pjøxkꞹjme na punkjꞹ. Kʼe apóstol Pablo go mama: “Xo ni jyodʼꞹ ra potꞹ rga zopjꞹji yo mi kjuarmaji, ngekʼua ra sʼiyaji yo nin minteji [ñe] ra pjøskʼojiyo”, nu ja ri jmurgojme nge kʼo ri kjagojme (Hebreos 10:24). Ngekʼua ma ri jmurgojme ri kjagojme trʼønꞹ in dyokjojme, ri ønꞹjme pje na kjaji ngekʼua ra pa̱rgojme ja ga bʼꞹnji, ma pje bʼɇtsʼpʼi ri pjøsʼꞹjme. Ma ri ñagojme ko in kjuarmagojme, bʼꞹma ra xitsʼkojme pje go tsjaji ngekʼua ro sɇchiji na nrrumꞹ, kʼo go tsjaji angezeji xo ra mbøxkojme ra sɇchijme yo nrrumꞹ.

Ma ri jmurgojme ri chjɇjmenu yo in dyokjojme. Nrrexe yo ntee kʼo poji nu ja ri jmurjme ri pa̱rgojme kjo ngeji, pje ni chju̱ji, xo ri pa̱rgojme ja bʼꞹbʼꞹ o ngunji. Bʼꞹbʼꞹ paa ke ri pa zenguajme in kjuarmagojme ñe bʼꞹbʼꞹ paa ma ri jmurꞹjme ri ñonꞹjme o ri eñegojme na nrrajme. ¿Ja ga mbøxkꞹjme ma ri kjagojmekʼo? Pjøxkꞹjme ra sʼiyagojme in kjuarmagojme, akjaba dabadiji ra pjøsʼꞹjme ma ra kjogꞹji nrrumꞹ (Proverbios 17:17). Na joo ke ra kjagojmekʼo, nange ne Biblia mama ga kjaba: “Ra potka pjøsteji” (1 Corintios 12:25, 26).

Na joo ke ri ma nuu nu ja jmurꞹji yo testigo e Jehová, yo in kjuarmagojme kjaji kʼo mama Mizhokjimi, angezeji na jonteji, pjøsʼꞹji nu in dyoji, jyodʼꞹgekʼo. Mage nu ja jmurꞹji.

• ¿Pjekja na joo ke ri mage jango ri jmurgojme?

• ¿Jingua ri mage jango ri jmurgojme?