Hiivano khaninhiya urwaa mmikutthaanoni cihu ceekristau, hataa woorwaa niviraka itakhwa cuulupale ni hataa ninivihaka ncuwa ni inirupaka ipula. Kontha isiyani Masaahiti a Yehova aneekurumicaaya wiira akhale wamoca ni mayamunnaaya, hataa yaakhumelelaka marikoriko awula yoocyaaka nlattu wo miteko cinvaraaya khula nihuku?

Unaanipanka saana. Oopelaka mwaha waataana wo mayamunna wanlokoni, apoostolu Paulu eerale wiira “nihaana niwaceranaka.” (Maberewu 10:24) Nna nuulumo nna, maanaaya wiira nihaana umananiha waacuwela saana mayamunneehu. Ayo moolumwaayo anaanisovenriha waawacera akhunanihu. Nlattu wo waacuwela amuci makristau akhwaawe, ninawoonenela wiira ahaavo ankhitiriki utthema marikoriko toko annikhumelela, ni ayo mamucyaayo pooti unikavihera nihiiva utthema.

Unaaniphwanyiha upatthani womaana. Mmikutthaanoni, khunakhala wiira ninkhalaka atthu oocuwelana paasi, masi ninkhalaka apatthani omaana. Mahuku makhwaawe, ninaavirihaka ukati ni mayamunneehu nithukaka saana. Ifayitani nimphwanyeehu nathukaka ni mayamunneehu? Ninawiitthuca uhisimana, ni iyo inaalipihaca ufentana wihu. Phimaana, yaakhumelelaka masakha mayamunneehu khanimpica upanka itthu wiira naakavihere. (Miruku 17:17) Nlattu wo waataana ni mayamunneehu otheene o wanlokoni, ninaakhitiri wooniherana wiira ninaawacerana.—1 Akorintu 12:25, 26.

Ni nyuuva ciicammo ninawuukurumicani ukhalana apatthani ampanka ile inoncivela Nluku. Nnaahala waaphwanya apatthani ookhalana ala makhalelwaala iriyari yo Masaahiti a Yehova. Nhihiye hatiitthu yuuhihakani waataana ni hiivano.

• Ukumana ni mayamunneehu mmikutthaanoni unniphwanyiha ifayitani?

• Nihukuni noocivenlyaayani urwaa waacuwela mayamunneehu?