6 УРОК
Погынымаш дене кылым кучымаш мыланна могай пайдам конда?
Игече сай огыл але кужу корным эрташ кӱлеш гынат, ме вашлиймашыш эре толаш тыршена. Нойымым да тӱрлӧ нелылыкым ончыде, Иегован Таныкше-влакым пырля вашлияш мо тарата? Молан нуно тидлан тынар шуко вийым пышташ ямде улыт?
Полышым налына. Вашлиймашыш толшо-влакым Павел икте-весе верч тыршыше лияш таратен (Еврей-влаклан 10:24). Тидыже икте-весым сайрак пален налаш кӱлмым ончыкта, икте-весе нерген шонаш тарата. Иза-ака-влак дене лишылрак лийына гын, мо нунылан тӱрлӧ нелылыкыштым сеҥаш полшен пален налына. Вара тыгаяк нелылык дене тӱкнена гын, нунын каҥашышт мыланна полшен кертеш.
Чын йолташ-влакым муына. Вашлиймашыш толшо-влак мыланна палыме еҥ гына огыл, а лишыл йолташ улыт. Ме вашлиймашыштына веле огыл пырля лийына, эше яра жапым пырля эртарена, пырля канена. Тиде мыланна могай пайдам конда? Ме икте-весым шукырак аклаш тунемына, мемнан коклаште йӧратымаш пеҥгыдемеш. Кунам иза-ака-влак нелылык дене тӱкнат, нунылан полшаш мемнан кумылна уло, вет ме икте-весылан чын йолташ улына (Притчи 17:17). Погынымашыште чыла иза-ака дене кылым кучена гын, икте-весына верч тыршымашнам ончыктена (1 Коринфян-влаклан 12:24—26).
Юмын эрыкшым шуктышо-влак коклаште йолташ-влакым кычалаш тендам таратена. Тыгай йолташ-шамычым Иегован Таныкше-влак коклаште муыда. Мемнан дене кылым кучаш тек тендам нимат огеш чаре!
-
Погынымаш дене кылым кучена гын, мыланна могай пайда лиеш?
-
Мемнан погынымашна дене палыме лияш кунам шонеда?