Swe Nte zya kwe Yehova tukaya mukulongana lyonsinye cingatenga tukupita mu mpanga umusape, mpamwi pano umusanya uwazile sana na pano kutalile nanti kuli invula. Nomba acani cino cikalenga swe Nte zya kwe Yehova twazanwa mu kulongana asa mulandu ni ntazi zino tukapitamo nanti pa mulandu wa kutonta kwe cila wanda?

Ukulongana ku katusansamusya nu kutuwomelezya. Pano e Paulo walanzile amazwi yakuti “Twelenganye pa wanji,” walozyanga ku wanawitu wano tukalongana nawo. (Waheberi 10:24) Ya-a amazwi yakasula ukuti tuzipizile ukuwamanya sana wonsinye wano tukalongana nawo. Acino amazwi ya mutumwa Paulo yakatuwomelezya sana ukuwikako amano ku wantu wanji. Ndi twamanyana na Wina Klistu ponga ni ndupwa zyawo, tungazana ukuti wamwi wacimvyapo intazi izikolane na zino tukupitamo, ukucita wo-o kungatwavwa na sweswenye ukusipicizya.

Ukulongana kukawomya wuciwuza witu. Awanawitu na wankazi wano tukalongana nawo watawa awantu wavye lelo wawa aviwuza vitu vino twakundana navyo sana. Impindi zimwi tukapekanyako na tumwi pa kuti twizizye ponga. Nomba awuzima ci wuno wawa mukucita wo-o? Ukucita wo-o kukalenga twawawikako sana amano na cino cikafumamo acakuti tukakundana sana nawanawitu na wankazi. Awanawitu na wankazi ndi waponelwa ni ntazi tukawavwa amuno lyo wuciwuza witu na woliwo wawoma kali. (Imilumbe 17:17) Nga cakuti tukuzanwa ponga na wa mwi wungwe wonsinye, apano tukalanjizya ukuti ‘tukasakamalana’.—1 Wakorinte 12:25, 26.

Acino tukumiwomelezya ukusola iviwuza vino vikacita ukulonda kwa kwe Leza. Kuno mungazana iviwuza vya musango wo-o, amwi wungwe lya Nte zya kwe Yehova. Acino mutiza muleke icili consinye cimilesye ukulongana na sweswe.

• Amulandu ci wuno cacindamila ukuzanwa mu kulongana?

• Ampindi ci yino mungakunda ukwizalongana na sweswe pa kuti mwize mulole vino tukalongana?