Pikija tecifamba mu makwasha anotyisa kana kuno mugariro wokunja wakashata kamare, itusu tinoenda ku musongano jedu jo ciKristu nguva jese. Kunyazi tino zvineso zvo upenyu zve kurembejeka pa kupera ko njiku yo basa ngenyi Zvapupu zva Jehovha zvinovangirira kusonganirana no vatendi doni?

Izvi zvinodikana kuitira kugara kwedu zvakanaka. Pauro wakatara kudari ecibvunja vaya votinosonganirana navo: “Ngatirindisane umwe no umweni”. (Vaheberi 10:24) Gama iri rinoda kureva “kurangarirana kamare” izvi zvinoti tigume pakuziva umwe no umweni. Ngo kudaro masoko o mupostori anotivangisa kuti tirambe ticitambujikira vamweni. Ngo kuziva mbhuri jimweni jo ciKristu, itusu tinofumbhura kuti vamweni vajo vakabudirira kunyisa zvineso zvakafanana no zvedu zve ivona vangatibesera kubudirira zvakanaka.

Kusonganirana kunovaka ushamwari hwakavanga. Kumusongano jedu tinoungana pondhopo kuciripi inga ciunganovo haco, asi inga boka ro shamwari jino kwhedererana. Munguva jimweni itusu tinopeja nguva pamwepo mu mubungaijo jinovaka. Ngo rapi besero rinobva pa ushamwari uhu? Tinojija kubongeserana zve izvi zvinovangisa kunamata kwedu ko rudo. Apo vadoni vedu vo ciKristu pavanowanana no zvineso, ciripo-ripoco tinovabesera ngokuti kuvanga ko ushamwari wakagajana. (Mazwi Akangwara 17:17) Ngo kusonganirana no ndhengu jese zvo pa ungano pedu itusu tinotatija kuti ‘tinongwarirana’ umwe no umweni.—1 VaKorinto 12:25, 26, BMAA.

Tiri kumuvangisanyi kuti musane kuita ushamwari no vaya vari kuita zvinoda Mwari. Ushamwari uhu mungakwanisa kuhuwana pakati po Zvapupu zva Jehovha. Tapota mucaregera ciri cese kuti cimuregerese kusonganirana na itusu.

• Ngenyi zvakanaka kusonganirana no vamweni mu musongano?

• Ndirini pa maizodakarira kusonganirana no ungano yedu?