Hewa’ae matörö gatua mazui teu sabölö-bölö, lö maböhöli we’amöi ba gangowuloa niha keriso. Hewa’ae oya ngawalö gabula dödö ba fa’amarase ba wangalui soguna ero ma’ökhö, hana wa la’odödögö sibai we’amöi ba gangowuloa niha keriso ira Samaduhu’ö Yehowa?

Ena’ö ohahau dödöma ba wamati. Ifarou dödö nono mbanua Lowalangi Faulo ena’ö ”faoma tafaigi nawöda zamösana”. (Heberai’o 10:24) Eluaha wehede da’a ”tahaogö wo’angeraigö”, mazui ena’ö faoma ta’ila nawöda zamösana. Tobali, fehede Waulo zamarou ya’aga ena’ö faoma ma ame’egö tödö nawöma zamösana. Na ahori ma’ila fefu ngambatö niha keriso tanö bö’ö, awena aboto ba dödöma wa no lataögö gabula dödö simane si göna khöma, börö zimanö tola latolo göi ndra’aga na abu dödöma.

Manga’aro’ö fahuwusa si lö tebulö. Ba nahia gangowuloa, sifalukha khöma, tenga ha si fa’ila manö, tobali si fahuwu khöma. Ba ginötö tanö bö’ö, möiga göi manörö-nörö. Hadia gunania wariawösa simane da’ö? Mafomaha ndra’aga wangosinangegö zamösana, ba tedou wa omasi ba gotaluama. Na so zifahuwu khöma si göna abula dödö, ba matolo ira soroi ba dödö börö me so wahuwusa saro. (Gamaedola 17:17) Na fariawö ndra’aga zamösana, da’ö zangoroma’ö wa ”ma’ame’egö tödö nawöma”.—I Korindro 12:25, 26.

Mafarou dödömi ena’ö mi fili nawömi ba wariawösa ha samalua somasi Lowalangi. Tola ösöndra da’ö ba gotalua ndra Samaduhu’ö Yehowa. Böi aombö dödöu na fariawö ndra’ugö khöma.

• Hana wa moguna fariawö ita ba gangowuloa?

• Hawa’ara omasi’ö aboto ba dödöu haniha ndra’aga?