Even vann’s veddah nett shay is adda vann’s veit is fa gay, doon miah alsnoch reklah zammah kumma an unsah fasamlinga. Even nohch en langah dawk funn shaffa un mitt di challenges funn layva, favass doon Jehova Sei Witnesses so feel effort nei fa zammah kumma?

Es helft uns in layva. Da Paulus hott ksawt miah sedda “uns bekimmahra fa nannah.” Eah voah am shvetza veyyich selli es miah zammah kumma mitt an di fasamling. (Hebräer 10:24) Dess maynd fa concerned sei fa anri un reeli lanna si kenna. So da Paulus hott ksawt miah sedda ebbes drumm gevva veyyich nannah. Bei lanna anri in di congregation bessah kenna, sayna miah es dayl leit aw fleicht di saymi challenges ivvah kumma sinn es miah henn, un si kenna uns helfa’s saym ding du.

Es macht goodi friends. Miah kumma zammah an unsah fasamlinga, nett yusht mitt leit es miah kenna, avvah mitt klohsi friends. Un miah kumma aw zammah anri zeida fa fann havva un zeit shpenda mitt-nannah. Vi dutt dess uns bennafida? Miah lanna fa nannah may apreeshayda un dess dutt unsah leevi shteikah macha fa nannah. Koss es miah klohsi friends sinn, kenna miah datt sei fa selli helfa es deich haddi zeida am gay sinn. (Shpricha 17:17) Bei zammah kumma mitt alli-ebbah in di congregation, veisa miah es miah ebbes drumm gevva veyyich nannah.​—1 Korinther 12:25, 26.

Pikk yusht friends es am du sinn vass Gott havva vill. Du zaylsht so friends finna unnich Jehova Sei Witnesses. Loss nix dich zrikk hayva funn zammah kumma mitt uns.

• Vi kann’s uns helfa fa zammah kumma mitt anri an di fasamlinga?

• Vann vetsht du shteahra selli in di congregation bessah kenna?