مینہ پوے،‏ نھیری آئے یاں سانوں لما فاصلہ طے کرنا پوے،‏ فیر وی اَسی اپنیاں عبادتاں تے لگاتار حاضر ہنے آں۔‏ دن بھر دی تھکاوٹ تے زندگی وچ مشکلاں دے باوجود،‏ اَسی اپنے مسیحی بھین بھراواں نال عبادتاں تے جمع ہون لئی اینی محنت کیوں کرنے آں؟‏

سانوں مشکلاں دا مقابلہ کرن لئی مدد مِلدی اے۔‏ پولُس رسول نے نصیحت کیتی کہ اَسی کلیسیا دے سارے بھیناں بھراواں دا خیال رکھئے۔‏ (‏عبرانیوں 10:‏24‏)‏ ایہدے لئی ضروری اے کہ اَسی اپنے بھیناں بھراواں نُوں چنگی طرحاں جانیے۔‏ ایس طرحاں سانوں پتہ چلے گا کہ اوہناں نے وی اوہی مشکلاں پار کیتیاں نیں جنہاں وچوں اَج اَسی لنگھ رہے آں۔‏ اوہناں نال دُکھ سُکھ سانجھے کرکے سانوں مشکلاں دا مقابلہ کرن لئی مدد ملے گی۔‏

سانوں سچے دوست مِلدے نیں۔‏ عبادتاں تے آؤن والیاں نال ساڈی صرف تھوڑی بوہتی جان پچھان یاں سلام دُعا ای نئیں ہوندی سگوں اوہ ساڈے پکے دوست ہوندے نیں۔‏ عبادت توں علاوہ اَسی کئی ہور موقعیاں تے وی اوہناں نال چنگی سنگت دا مزا لینے آں۔‏ سانوں ایس سنگت دا کیہہ فائدہ ہوندا اے؟‏ ساڈے دلاں وچ اِک دُوجے لئی قدر ودھدی اے تے ساڈا پیار ہور گُوڑھا ہوندا اے‏۔‏ ایہدے علاوہ جدوں ساڈے مسیحی بھین بھراواں تے کوئی مشکل گھڑی آؤندی اے تے اَسی سچی دوستی دا فرض نبھاؤندے ہویاں اوہناں دا سہارا بننے آں۔‏ (‏امثال 17:‏17‏)‏ کلیسیا دے سارے بھین بھراواں نال سنگت رکھ کے اَسی وکھانے آں کہ سانوں اِک دُوجے دی دلوں فکر اے۔‏—‏1-‏کُرنتھیوں 12:‏25،‏ 26‏۔‏

ایہہ بڑی چنگی گل ہووے گی کہ تُسی خدا دی مرضی تے چلن والے لوکاں نال دوستی کرو۔‏ ایہہ لوک توانوں یہوواہ دے گواہواں دیاں کلیسیاواں وچ مِلن گے۔‏ ساڈے نال سنگت رکھن دی راہ وچ کسے وی چیز نُوں رکاوٹ نہ بنن دَوو۔‏

• سانوں مسیحی بھین بھراواں دی سنگت دے کیہڑے فائدے ہوندے نیں؟‏

• تُسی ساڈیاں عبادتاں تے کدوں آؤ گے؟‏