Jehóvap testigusnin mana sackeycu tantacunasman ’riyta, mana importas si tiempu ancha sajra tían, ancha carupi causaycu o si marchanaycu tían sacha ucuta. ¿Imajchus anchát esforsacuycu, huauckesniycuan tantanacunaycúpaj mana importas si saycusckas tiaycu, túcuy punchau llamcasckaycuraycu o problemasraycu causaymanta?

Allít tiáypaj yanapaaycu. Apostol Pablu ckaachera presisasckaycuta tantacunasman ’riyta, áicap nera: «sujcuna sujcunaan consideracúysh» (Hebreos 10:24). Considéray niyta munan «atenciunuan imaj cachun ckaayta». Chá nisckaan ninaara ima nockaycupura ’rejsicunaycu tían y preocupacunaycu tían sujcunaraycu. Áicap astaan ’rejsiycu sujcuna huauckesta, ckaaycu ima huaquin paycunamanta quiquin imastis usorancu quiquin nockaycu ina y atincu yanapaayshta ñauckeman llojsinaycúpaj.

Alli yanasus ’ruaycu. Tantacunaspi manalla tiaycu ckarisuan o huarmisuan ’rejsisckas manapé alli yanasusuan. Astaanpas, tantanacuycu sujcuna punchaus ’rimáypaj, micúypaj, pujlláypaj. ¿Imaina nockaycuta yanapaaycu huauckesniycuan tiayta? Astaan valoranacuyta yachachiaycu y munayniycu huauckesraycu astaan sinchi canánpaj. Y huauckesniycu problemasman enfrentacuptincuna chayllapi yanapacuycu, suj sinchi amistarta apisckaycuraycu (Proverbios 17:17). Áicap túcuy huauckesniycuan congregaciunmanta ’rimaycu y tiempút paycunaan crusaycu, ckaachiycu ima «sujcuna sujcunaraycu» preocupacuycu (1 Corintios 12:25, 26).

Animasuycu ajllanayquípaj yanasus ina picunát Yaya munasckanta ’ruancu. Chá laya yanasusta Jehóvap testigusninpi tárej ’rinqui. Ama sackeychu ni imapas arcasunanta nockaycuan tantacunayquípaj.

• ¿Imaina yanapaaycu huauckesniycuan congregaciunmanta tantanacuyta?

• ¿Áicap munanquiman congregaciunniycuta ’rejsiyta?