Jehovahuaj testigogunaga carumanda ashas, tamiajpis mana tamiajpis tandarinama shamunara mana saquinchichu. Turmindusguna tiajpis, sambayashca ashas, ñucanchi huauquiunahua tandarinara ¿imarasha mana saquinchi?

Ali sumaj causangahua yanapan. Tandarina ministirishcamanda yachachiushaga, apóstol Pablo casnami nica: “Ñucanchipura parijumanda iyarishunchi, mas mas llaquinausha, alira rausha yanaparingaj” (Hebreos 10:24). Ñucanchipura parijumanda llaquingahua, ñucanchi huauquiunaras, paniunaras ali ricsinami anchi. Tandarinama riujcunara ali ricsishaga intindinchimi paigunas ñucanchi cuinta llaquiunaras turmindusgunaras charinushca, chiraigu ñucanchira yanapaira ushanun.

Ali amigogunara tupangaj yanapan. Tandarinai llaquinujpura tiaunchi. Astaumbas shu ratu alilla pasangahua tandarinchimi. Ali amigogunara charinaga ¿imasnara yanapan? Shujcunara respetasha llaquingahua yanapan. Shinallara ñucanchipura ali causangahuas yanapan. Astaumbas maicambas turmindusgunara charijpi uctalla yanapangaj rinchi (1 Pedro 3:8). Tucuiguna “parijumanda cuiranuchu” nisha Biblia mandashcara pactachinchi (1 Corintios 12:25, 26).

Diospa munaira pactachijcunahuan can amigo tucuchu munanchimi. Jehovahuaj testigogunapura ali amigogunara tupangui. Tandarinama shamungahua ama imas arcachu saquingui.

• Tandarinama shamunaga ¿imarasha ali an?

• ¿Imaurasta tandarinama shamungaraungui?