Tamia punllacunapi turu turu ñangunata rina cashpa o carupi causashpapash testigo de Jehovacunaca tucui tandanajuicunapi cangapami ninanda esforzaripanchi. Problemacunata charishpa, trabajomanda shaijushca cashpapash ¿imamandata ñucanchi huauquicunahuan, panicunahuan tandanajunataca na saquipanchi?

Problemacunata chimbapurachunmi ayudan. Tandanajuiman rina minishtirishcamanda parlashpami apóstol Pabloca nirca, ‘caishujhuan chaishujhuan yarichirishunchi’ nishpa (Hebreos 10:24). Yarichirishunchi nishpaca, shujcunata aliguta rijsichun, shujcunamanda preocuparichunmi Pabloca animajurca. Ñucanchi congregacionbi huauquicunata, panicunata ali rijsishpami ñucanchishna problemacunata charishcata yachaj chayanchi. Chai problemacunata paicuna imashina chimbapurashcata yachanami, ñucanchipash chaitallata rurachun ayudan.

Ali amigocunata charichunmi ayudan. Tandanajuicunapica alipacha amigocunatami charinchi. Shinallata shuj ladocunapi purigringapaj, pugllagringapajpashmi paicunahuan llujshinchi. Chaita ruranami congregacionbi tucuicunata respetachun, ashtahuan juyachunbash ayudan. Huauquicunahuan, panicunahuan ali llevarishcamandami paicuna imapash llaquicunata charijpica ñapash ayudagrinchi (Proverbios 17:17). Congregacionbi tucuicunahuan ali llevarishpami caishuj chaishuj preocuparishcata ricuchipanchi (1 Corintios 12:​25, 26).

Diospa munaita rurashpa causajcunahuan amigo tucuchunmi animapanchi. Testigo de Jehovacunapa tandanajuiman shamushpami shina amigocunata taripangui. Chaimandami tandanajuicunaman shamuchun animapanchi.

• Huauquicunahuan, panicunahuan tandanajunaca ¿imapita ayudan?

• ¿Ima horata ñucanchi tandanajuiman shamugripangui?