‘Inea ne tes tä se noanoa ne sala ne raksa‘ ne lȧg ta, ‘ạmis la‘ ma kikia se ‘otomis tạunạ‘i. Kop ma noanoa ne mȧür ta ne fạiȧk ne garue ne terȧn ta, ka pō ‘e tes tä famör Uetnes ‘on Jihova fe‘en‘ȧk la tē ag‘esea ma ‘oris hensạsiag ne pilif ta?

Iạ tē leleit se ‘otomis mạuri. ‘E ‘otomis tētē ag‘esea ‘e kạurotuga, Paula fȧ‘ sio la ‘ạmis la ‘hạia‘häe‘ạkigen le‘et se le‘et.’ (Hiperiu 10:24) ‘On fuạg ne fäeag ‘i “la a‘häe‘ȧk” ma la hại‘ineag lelei le‘et se le‘et. Fäeag ‘on ‘apostol ta a‘ne‘ne‘ạkia ‘ạmis la kokon‘ȧk iris ne tore. ‘E av ne ‘ạmis hại‘ineag lelei ma ‘otomis hensạsiga ‘e kạurotuga, ‘ạmis räe ne iris vahiạ la röt‘ạkia noanoa ma‘oi ne iris agtạu ma. Tē ne iris rē, la pō la hạiasoagan ‘ạmis la a‘leleia ‘otomis noanoa.

Iạ a‘fūmou‘ạkia ‘otomis hạikạinagaga. ‘E ‘otomis tạutạunạ‘i, ‘ạmis tē ag‘esea, ‘eake la fak se ‘ạmis hại‘ineag la‘ma, ka ‘ạmis kạumane‘ag hại‘eleag pạu. ‘E av hoi‘ȧk, ‘ạmis tē ag‘esea ‘e tē fak‘oaf‘ofa. Tes ta ‘on ‘es‘ao ne tētē ag‘esea tape‘i? ‘Ạmis rak la kel‘ạkia huạg ‘uạ‘uạ‘ạki se ‘otomis sạsigi ma a‘fūmou‘ạkia ‘otomis hanisi. Ma, ‘e av ne pefä‘e sok se ‘otomis hensạsiga, ‘ạmis noh iạtiạt la hạiasoag se irisa ‘e rēko fūmou ne ‘otomis hạikạinagaga. (Fäeag ‘Es Fuạga 17:17) ‘Ạmis kel‘ȧk ne tatạu ‘otomis “kokon‘ȧk ne le‘et ma le‘et” ‘e ‘otomis tētē ag‘esea ‘e kạurotuga.’​—1 Korinita 12:25, 26.

Nā vahiạ la hil ‘ou kạumane‘aga ‘e iris ne a‘sokoa fiongar ‘on ‘Ạitu. ‘Äe la pō kạumane‘ag tape‘ ‘e laloag ne famör Uetnes ‘on Jihova. Figalelei ma se fue‘ la ta tēet la fu‘ạkia ‘äe ‘e ‘ou pa tē ag‘esea ma ‘ạmis.

• Ka pō ‘e tes tä iạ tē pumuet la ‘is la tē ag‘esea ‘e tạunạ‘i?

• Ka ‘e av hes tä ‘äe la ‘oaf la hạ‘ineag ma ‘otomis kạurotuag ta?