Mito bayicho xiˈmino dubbo tayinse woy qiidunninna arrishshunni haˈneemmo woti no; ikkirono togoori heeˈreenna ayyaanaamo gambooshshenke ganyine haˈneemmo. Yihowa Farciˈraasine addi addi qarri heeˈreenna, hattono loosunni daafurte heedhenni ammanate roduuwinsa ledo gamba yitannohu mayiraati?

Mitteenni gamba yaanke keerinkera danchate. Phaawuloosi songote giddo ledonke gamba yaanno mannire coyiˈranni, “Mimmito towaaxxino” yiino. (Ibiraawuyaani 10:24) Hatto yaasi, “kuˈu kuˈuyi daafira seekkine hendo,” yaano mimmito seekkine egennino yaasiiti. Konni daafira kuni qummeeshshi mimmitoho hajama hasiissannonketa amaalanno. Roduuwinke ledo egennammummoro, mitu roduuwi ninkehu gedee qarri iilleennansa dandiite saˈinotanna ninkeno kaaˈlitankera dandiitannota huwanteemmo.

Mimmitu ledo lubbora jaaloommeemmo gede assitannonke. Gambooshsheho gamba yineemmohu mulla iimi adda egennammoommo manni ledo ikkikkinni, lubbote jaallanke ledooti. Mito woyite kayinni mitteenni gamba yine boohaarreemmo. Konni garinni mimmitunniwa aananke kaaˈlitannonkeri no? Togoo aante kuˈu koˈoye naandeemmonna galanteemmo faro fantannonke; tini qolte roore lubbora baxammeemmo gede assitannonke. Togoo baxilli heeˈrinkero, roduuwinke qarrantanno woyite insara lubbote jaalla ikkinoommo daafira ranke iillineemmonsa. (Lawishsha 17:17) Songote giddo noo roduuwi baalunkuwa aanneemmoha ikkiro, “mimmitoho taalo hendeemmota” leellinsheemmo.—1 Qorontoosi 12:25, 26.

Maganu fajjo assanni noo manna jaallakki assiˈratto gede amaalleemmohe. Togoo jaalla Yihowa Farciˈraasine mereero afiˈra dandaatto. Ninkewa aanattota mitturi nafa hoolahera wodhitooti.

• Ammanate roduuwinke ledo mitteenni gamba yaanke maaho kaaˈlitannonke?

• Ninke ledo egennamate songonke daattohu mamooteeti?