Neongo kapau ‘oku fiema‘u ke mau fononga ‘o fou ‘i ha vaotā fihi lahi, pe fai ha fononga neongo ‘a e kovi ‘a e ‘eá, ‘oku mau ma‘u ma‘u pē ‘emau ngaahi fakataha faka-Kalisitiané. Neongo ‘a e ngaahi faingata‘a ‘o e mo‘uí mo e hela‘ia hili e ngāue ‘o e ‘ahó, ko e hā ‘oku fai ai ‘e he Kau Fakamo‘oni ‘a Sihová ha feinga pehē ke feohi mo e ngaahi kaungātuí?

‘Oku lelei ia ki he‘emau mo‘uí. “Ke tau fetokanga‘aki,” ko e tohi ia ‘a Paulá, ‘i he‘ene lea fekau‘aki mo e fa‘ahinga ‘oku tau feohi mo ia ‘i he fakataha‘angá. (Hepelū 10:24) ‘Oku ‘uhinga ‘a e kupu‘i lea ko ení “ke fakakaukau fakalelei,” ‘a ia, ko e feinga ke fe‘ilongaki. Ko ia ko e ngaahi lea ‘a e ‘apositoló ‘oku fakalototo‘a‘i ai kimautolu ke mau tokanga fekau‘aki mo e ni‘ihi kehé. ‘I he feinga ke ‘ilo ‘a e ngaahi fāmili Kalisitiane kehé, ‘oku mau ‘ilo ai ko e ni‘ihi ‘o kinautolu kuo nau iku‘i lavame‘a ‘a e ngaahi faingata‘a meimei tatau mo ha‘amautolú pea ‘oku lava ke nau tokoni‘i kimautolu ke mau toe lavame‘a foki.

‘Oku langa hake ai ‘a e ngaahi kaungāme‘a tu‘uloa. ‘I he‘emau ngaahi fakatahá, ‘oku mau fakatahataha fakataha, ‘o ‘ikai mo e ngaahi mahení pē, ka ko ha kulupu ‘o e ngaahi kaungāme‘a ofi. ‘I he ngaahi taimi kehé, ‘oku mau fakamoleki fakataha ai ‘a e taimi ‘i ha fakafiefia lelei. Ko e hā e ‘aonga ‘oku ma‘u ‘i he feohi peheé? ‘Oku mau ako ai ke fehounga‘ia‘aki lahi ange, pea ‘oku ‘ai ai ke mālohi ‘a e ha‘i ‘o ‘emau ‘ofá. ‘I he taimi leva ‘oku fehangahangai ai homau ngaahi kaungāme‘á mo e ngaahi palopalemá, ‘oku mau loto-lelei ke tokoni‘i kinautolu koe‘uhí kuo ‘osi fokotu‘u ‘a e ngaahi kaungāme‘a mālohi. (Palōveepi 17:17) ‘I he feohi mo e mēmipa kotoa pē ‘o ‘emau fakataha‘angá, ‘oku mau fakahaa‘i ai ‘oku mau “tau‘aki fetokanga‘aki.”​—1 Kolinitō 12:25, 26.

‘Oku mau fakalototo‘a‘i atu ke ke fili ko ho ngaahi kaungāme‘a ‘a e fa‘ahinga ko ē ‘oku nau fai ‘a e finangalo ‘o e ‘Otuá. Te ke ma‘u ‘a e ngaahi kaungāme‘a peheé ‘i he ha‘oha‘onga ‘o e Kau Fakamo‘oni ‘a Sihová. Kātaki ‘o ‘oua ‘e faka‘atā ha me‘a ke ne ta‘ofi koe mei ho‘o feohi mo kimautolú.

• Ko e hā ‘oku ‘aonga ai kiate kitautolu ke feohi fakataha ‘i he ngaahi fakatahá?

• Ko e taimi fē te ke sai‘ia ai ke hoko ‘o maheni mo ‘emau fakataha‘angá?